သူရဿဝါနှင့် Chatting

“သူရဿဝါနှင့် Chatting”

ဒီတစ်ပတ် ရေးဖို့ စိတ်ကူးမိ တာကတော့ Chatting ပါ။ ဒီဝေါဟာရ ကိုတော့ အထွေအထူး ရှင်းပြစရာ လိုမယ် မထင် ပါဘူး။ အမြန်ယာဉ်လိုင်း တွေလို မြန်ဆန်ရမ်းကား .. အဲ .. အဲ .. မြန်ဆန်ထွန်းကား လှတဲ့ နည်းပညာ ခေတ်ကြီးကို အလွန်အကျူး နည်းမှန်လမ်းမှန် လေ့လာ လိုက်စား နိုင်ကြတဲ့ သူရဿဝါတို့ မြန်မာ နိုင်ငံသား အတော်များများ ကတော့ အင်တာနက် ဆိုရင် ချက်တင်ထိုင်တယ် ဆိုတာနဲ့ တွဲပြီး သိကြပါတယ်။ ချက်တင်က ဒီလောက်အထိ ကျွန်တော်တို့ တတွေကို လွှမ်းမိုးထား နိုင်တယ်ခင်ဗျ။ အင်တာနက် စသုံးခါစ User အားလုံးနီးပါး ချက်တင် မထိုင်ဖူးသူ မရှိဘူးလို့ ထင်ပါတယ်။ သူရဿဝါ ကိုယ်တိုင်လည်း အင်တာနက် စသုံးတတ် ခါစမှာ ချက်တင်ထိုင်ခြင်းနဲ့ မကင်းခဲ့ပါဘူး။

ကျွန်တော့် အစ်ကိုဝမ်းကွဲက ကျွန်တော့်ကို အင်တာနက် သုံးတာ စသင်ပေးမယ် ဆိုတုန်းက တခြား ဘာမှ မလုပ်ခိုင်း ပါဘူး။ အင်တာနက်ကို စွဲသွားအောင် Chat Room ထဲမှာ အကောင့်တစ်ခု ဖွင့်ပေး၊ နောက် G-mail အကောင့် တစ်ခု ဖွင့်ပေးပြီး တစ်နေကုန် ချက်တင်ထိုင်ခိုင်း တော့တာပဲ။ သူပြောပုံက ရှင်းရှင်းလေး၊ Chat Room ထဲမှာ တွေ့တဲ့ လူတွေထဲက ကိုယ်ပြောချင်တဲ့ သူနဲ့ စကားပြော၊ မိတ်ဆက်၊ ပြီးလို့ အဆင်ပြေရင် G-mail လိပ်စာချင်း ဖလှယ်၊ ပြီးရင် G-talk ထဲမှာပြော .. အဲဒီလို အဆင့်ဆင့်ပေါ့။ ကျွန်တော်လည်း သူသင်ပေးသလို လုပ်တာပေါ့။ Chat Room ထဲကနေ လူတစ်ယောက်နဲ့ ခင်ပြီးလို့ ကိုယ့်ရဲ့ G-talk ထဲ အကောင့်တစ်ခု တိုးလာရင် သိပ်ပျော်တာ။ အစ်ကို့ အင်တာနက် ဆိုင်ရဲ့ Server မှာ ဆန့်ဆန့်ကြီး ထိုင်လို့၊ မျက်မှောင်ကြီး ကုပ်လို့၊ ကီးဘုတ်နဲ့ လက်နဲ့ တဂျောက်ဂျောက် နှိပ်နေတဲ့ သူရဿဝါကို ဆိုင်ထဲ ဝင်လာသူများ သိပ်အထင်ကြီး ကြပါတယ်။ မျက်မှောင်ကြီးတောင် ကုပ်ပြီး လုပ်နေရတယ် ဆိုတော့ ဘယ်လောက် ခက်ခဲ နက်နဲတဲ့ အလုပ်တွေ များလဲလို့ ပေါ့လေ။ တကယ်က .. ဘာမှ မဟုတ်ဘူး။ ရုပ်ကသာ အလုပ်ကြီး အကိုင်ကြီး မျက်နှာပေး … အမှန်က Chat Room တကာ ပြဲပြဲစင်အောင် ပတ်ချာလည် လှည့်နေတာ။

ချက်တင်ကို စွဲတာမှ ပြောမနေနဲ့ … မနက် မိုးလင်း ဆိုင်ဖွင့်ပြီ ဆိုကတည်းက တခြားသူ သုံးမသုံးတော့ မသိဘူး။ ကျွန်တော်က တစ်နေကုန်ပဲ၊ ဘေးခုံမှာ စားစရာ သောက်စရာ ရိက္ခာ အပြည့်အစုံ ယူပြီးတော့ကို တစ်နေကုန် တစ်နေခန်း ထိုင်တာခင်ဗျ။ သင်ပေးတဲ့ အစ်ကိုဝမ်းကွဲလည်း တခြား ဘာမှ သင်ပေးလို့ မရတော့ဘူး။ ပေကပ်ပြီးတော့ကို နေတာ … ဖနောင့်နဲ့ ပေါက်လည်း အေးဆေးပဲ။ သူလည်း သူ့ဟာသူ ပေါက်ချင်တာပေါက်၊ ဒီမှာက ချက်နေတာ အပြုံးကို မပျက်ဘူး။ ချက်တင်ထိုင်နေရင်း ငုတ်တုပ်ကြီး သေသွားရင်တောင် အဲဒါကို စွဲတဲ့စိတ်နဲ့ Chat Room စောင့်တဲ့ သရဲ ဖြစ်နေမှာ စိုးရိမ်ရတယ်။ ဒီလောက်အထိ ချက်တင်ကို စွဲခဲ့ပါတယ်။

ချက်တင် အထိုင်ကောင်းလို့ ဒုက္ခရောက်ဖူး သလို .. သူများကိုလည်း ဒုက္ခ ပေးဖူးပါတယ်။ တစ်ခါတော့ ကျွန်တော် အွန်လိုင်းမှာ မိန်းကလေး တစ်ယောက်နဲ့ ချက်တင်ထိုင် မိပါတယ်။ သူ့ Nick Name က White Virgin ပါတဲ့။ အဖြူရောင် အပျိုစင်ကလေး ပေါ့ဗျာ။ နာမည်လေးလဲလှ၊ အပြောအဆို ကလေးလည်း ညက်၊ ဆိုတော့ကာ … အွန်လိုင်းမှာ ပြောရုံနဲ့ မပြီးဘဲ အပြင်မှာ တွေ့ဖို့ပါ ချိန်းမိကြ ပါတယ်။ အပြင်မှာ တွေ့ကြမယ် … ဘယ်လို ဆုံမလဲလို့ မေးတော့ သူက သူအခု သုံးနေတဲ့ အင်တာနက်ဆိုင်မှာ လာခေါ်ပါတဲ့။ ကျွန်တော်က စမ်းချောင်းမှာ၊ သူက မြို့ထဲမှာ။ ဒါနဲ့ ကျွန်တော်လည်း နာရီဝက်အတွင်း အရောက်လာမယ်၊ စောင့်နေပေါ့။ သူကလည်း “အင်း ..” တဲ့။ “ယူ .. တကယ် လာခဲ့နော် .. တို့ စောင့်နေမှာ .. တို့က အကျီ င်္ အဖြူရောင်လေး ဝတ်ထားတယ် .. တစ်ဆိုင်လုံးမှာ တို့တစ်ယောက်ပဲ အဖြူရောင် ဝတ်ထားတာ ..” တဲ့။ ကျွန်တော်ကလည်း ဘယ်ရမလဲ .. အားကျမခံ “စိတ်ချပါ အပျိုဖြူလေးရယ် … တို့တကယ် လာမှာပေါ့ … မင်းသာ တကယ် စောင့်နေ” ပေါ့။ မြို့ထဲ ထွက်ခဲ့ပါတယ်။

မြို့ထဲရောက်တော့ သူပြောတဲ့ အင်တာနက်ဆိုင်ကို ခပ်လွယ်လွယ်ပဲ တွေ့ပါတယ်။ အကြည့်ခံအောင် .. မျက်နှာကို အစွမ်းကုန် ပြုံးဖြဲပြီး ဆိုင်တံခါး ခပ်တည်တည် တွန်းဖွင့် ဝင်လိုက်ပါတယ်။ တစ်ဆိုင်လုံးမှာ တစ်ယောက်တည်း အဖြူရောင် … တွေ့ပြီဗျာ ၊ ထင်းနေတာပဲ။ ထင်းမှာပေါ့ …. အဖြူရောင် အပျိုစင်လေးမှ မဟုတ်တာ၊ မီးခိုးရောင် အပျိုလုံးကြီးဗျာ။ တကယ်ပြောတာ … ဖီးကြမ်း ငှက်ပျောသီးကြီး ကျနေတာပဲ။ ဝဝလင်လင်ကြီး .. လုံးလုံးကြီး .. ညိုတာမှ ညို့နေတာပဲ။ သူရဿဝါ ဆိုင်ပြင်ကို ဘယ်လို ပြန်ရောက် သွားမှန်းကို မသိဘူး။ အပြင်ရောက်မှ တဟောဟော တဟဲဟဲနဲ့ အသက်ကို ဝအောင် မနည်းရှူရတယ်။ ဘယ်လို လုပ်ရပါ့ .. သူ့ပုံစံကလည်း ကိုယ်မလာမချင်း ထမယ့်ပုံ မပေါ်။ ကမန်းကတမ်း အကြံထုတ်ရတယ်။ ဟိုဟိုဒီဒီ လျှောက်ကြည့်တော့ ဆိုင်ရဲ့ တံခါးမှာ ဆိုင်ကို ဆက်သွယ်ရမယ့် ဖုန်းနံပါတ် တွေ့ပါလေရော။

ဒါနဲ့ ဖုန်းဆိုင် တစ်ဆိုင်ထဲ ဝင်ပြီး “ဆိုင်ထဲက White Angel ဆိုတဲ့ မိန်းကလေးကို ခုနက ချိန်းထားတဲ့ ကောင်လေးက ဖုန်းဆက်တယ်လို့ ပြောပေးပါ” ဆိုပြီး ခေါ်ခိုင်းရတယ်။ မကြာပါဘူး … အပျိုညိုလုံးကြီး ဖုန်းလာကိုင် ပါတယ်။ အမယ် … သူကတောင် ဆီးပြီး ဟောက်လိုက် သေးတယ်။ “မလာသေးဘူးလား .. ယူ့ကို စောင့်နေတာ ကြာပြီ .. ဘယ်ရောက် နေတာလဲ” တဲ့။ ကျွန်တော် မနည်း အသံဖျက်ပြီး ပြန်ဖြေလိုက်ပါတယ်။ “ဟားရေး … အားပျိုစင်ကလေး … ကုလားလေးနော် … မြို့ထဲ ရောက်နေတယ်နော် … ကန်မလေး ပြောတဲ့ ဆိုင်ကိုနော် … ကုလားလေး ရှာမတွေ့ဘူး .. လည်နေတယ်နော် … သေချာ ပြန်ပြော …” ဆိုပြီးလည်း ပြောလိုက်ရော စကားပြန်တောင် မရတော့ဘူး။ “ဂွပ်” ခနဲ အလန့်တကြား ဖုန်းချ သွားပါလေရော။ ဒီတော့မှ သူရဿဝါလည်း အနန္တော အနန္တငါးပါး ဂုဏ်ကျေးဇူးကို တဖွဖွရွတ်ပြီး ပြန်လာ ခဲ့ပါတယ်။

နောက်တစ်ခါ ကျတော့ အွန်လိုင်းမှာ ချက်တင် ထိုင်ရင်းနဲ့ ရန်ဖြစ်တာပါ။ ဖြစ်ပုံက သူက ယောင်္ကျားလေး … ကျွန်တော့် အကောင့်ကို သေချာ မကြည့်ဘဲ မိန်းကလေး အောင့်မေ့လို့ လာဟိုင်းတာ။ ဒါနဲ့ ကျွန်တော်က ပြန်ပြောတော့ ယောင်္ကျားလေးမှန်း သိသွားတယ်။ အဲဒီတော့မှ “ဟာကွာ .. မင်းက ဘွိုင်းလား … ငါက မိန်းကလေး ထင်လို့ကွာ ဘာလုပ်ရမှာလဲ” တဲ့။ ကြည့်ဦး .. ပြောပုံကိုက .. မိန်းကလေး ဆိုတော့ရော အွန်လိုင်းကနေ ဘာလုပ်လို့ရမယ် ထင်နေလို့လဲ မသိပါဘူး။ အဲဒီကနေ စပြီး ရန်ဖြစ် ကြတာ။ သူလည်း ဆဲ၊ ကိုယ်ကလည်း အားကျမခံ ပြန်ဆဲပေါ့။ အဲဒီလို အပြန်အလှန် ဆဲရင်းက စိတ်တွေ တိုလာကြရော။ သူက “မင်း လူမိုက်လား .. သတ္တိရှိရင် အပြင်မှာ ချိန်းပြီး ဖိုက်မယ်လေ .. ထွက်ခဲ့ … လာ” တဲ့။ ကျွန်တော်ကလည်း ငြိမ်ခံ မနေပါဘူး။ “အောင်မာ .. မင်းလောက်ကတော့ အမြီးပါဖြတ်ပြီး ပြုတ်စား ပစ်လိုက်မယ် .. ဟေ့ကောင် … မိုက်တယ်ကွ … တစ်ယောက်ချင်း ချချင်ရင် လာခဲ့လေ .. အင်းစိန် ပေါက်တောဝ မှတ်တိုင်ကို … ငါစောင့်နေမယ် … တွေ့ရင်တော့ လက်သီးချင်း ယှဉ်ထိုးနော် … ပြေးတော့ မကိုက်နဲ့ .. ကြားလား” ဆိုပြီး သူ မခံချင်အောင် ပြန်ပြောပါတယ်။ သူကလည်း ဒေါသတွေ တရှဲရှဲ ထွက်ပြီး “အေး .. လာပြီကွ” ဆိုပြီး အောက်သွား ပါတယ်။ ဒီလို လာကျောလို့တော့ ဘယ်ရမလဲ .. သူရဿဝါလေ … ကိုယ်က စမ်းချောင်းမှာ၊ သူ့ကို အင်းစိန် ချိန်းပစ် လိုက်တယ်။ တကယ်က အဲဒီ အင်းစိန် ပေါက်တောဝ ဆိုတာ ဘယ်နားမှန်းတောင် ရေးတေးတေး မသိပါဘူး။ ကျွန်တော်လည်း မသွားပါဘူး။ ဒီအတိုင်း ဆက်ထိုင် နေတာပဲ။ သူကတော့ တကယ်သွား မသွား ကျွန်တော်လည်း မပြောတတ်ဘူး။

အဲဒီလိုပါပဲ။ ချက်တင် လောကမှာ ကျွန်တော်တို့ ကျင်လည် နေခဲ့တာ၊ ကျင်လည်နေ ကြတာ။ ကျွန်တော် အင်တာနက်ပါးဝသွားလို့ အခုတော့ ချက်တင် မထိုင် ဖြစ်တော့ပါဘူး။ ဒါပေမယ့်လည်း ကိုယ့်လို အခုမှ စသုံးတဲ့ လူငယ် လူရွယ် အတော်များများ ရှေ့လူများရဲ့ အစဉ်အလာကို ဆက်ခံပြီး ချက်တင်ထိုင် ကြဦးမှာပါပဲ။ ကိုယ်နဲ့ အဆင် ပြေရင် စကားလေး ပြောလိုက်၊ အပြင်မှာ ချိန်းလိုက်၊ ရန်တွေ ဖြစ်လိုက်နဲ့ ချက်တင်ထိုင်ခြင်း အလေ့အထဟာ အင်တာနက် သုံးစွဲသူ လူတန်းစားတို့ရဲ့ ယဉ်ကျေးမှု တစ်ရပ်တောင် ဖြစ်နေခဲ့ပြီ ဆိုတာ အသေအချာပဲလို့ ကျွန်တော်တော့ ပြောချင် ပါတယ်။

သူရဿဝါနှင့် ဘလော့အဝါ့ဒ်

“သူရဿဝါနှင့် ဘလော့အဝါ့ဒ်”

တစ်ရံရောအခါ အလွန်တရာမှ ခေတ်မှီ တိုးတက်၍ မြန်ဆန် သွက်လက်သော အင်တာနက် အမည်တွင် ခေတ်ကြီး တစ်ခေတ် ရှိခဲ့လေသည် ဟူ၏။ စာရေးဆရာ၊ စာရေးသူကို အင်္ဂလိပ် အခေါ်အရ ဝရိုက်ထာ (Writer) ဟု အမည်ပညတ် သတ်မှတ်လေ့ ရှိကြရာ ထိုခေတ်တွင် အင်တာနက် အွန်လိုင်းပေါ် တက်၍ ကဗျာ၊ ဝတ္ထု၊ စိတ်ကူးယဉ် စသည့် စာတိုပေစ လေးများကို ရေးသားကြသည့် အချို့သော စာရူးပေရူး ကလေးများကို အွန်လိုင်းဝရိုက်ထာ (Online Writer) ဟုလည်း ခေါ်တွင်သမှု ပြုကြပေ၏။ ၄င်းတို့ ရေးသားပြုစု အပ်သော စာကြောင်းစာသား အစုအဖွဲ့ များကိုလည်း ဘလော့ (Blog) ဟု အမည်သညာ ခေါ်တွင်စရာ ပြုကြလေသည်။ စာပေ အနုပညာကို လွန်စွာမှ ရူးသွပ်ပြာနှမ်း ကြသည့် ခေတ်ကြီး ဖြစ်သည့်အလျောက် အဖိုးကြီးလည်း ဘလော့၊ အဖွားကြီးလည်း ဘလော့၊ မွေးကင်းစ အာပြဲလေးလည်း ဘလော့ကြကာ ခွေးကိုက်လည်း ဘလော့၊ ကြောင်ကုတ်လည်း ဘလော့၊ အိမ်မြှောင် ကြွက် ကျီးကန်း အော်လည်း ဘလော့ကြ ကုန်သည်သာ ဖြစ်လေ၏။

ထိုသို့ ဘလော့ ပါများလတ်သော် ဘလော့ဆရာများ အားမငယ်ပဲ ပိုမို၍ ကြိုးစား ရေးသား ကြလေအောင် စိတ်ကူး၍ နဂို ကနဦး ဘလော့ ခဲ့ကြသော အွန်လိုင်းဝရိုက်ထာ များမှ အကြီးအမှူး ပြု၍ တစ်နှစ်အတွင်း အကောင်းဆုံး ရေးသား ခဲ့ကြသည့် အွန်လိုင်း ဝရိုက်ထာ ပိစိကွေးလေးများ၏ ဘလော့များကို အမျိုးအစား အလိုက် ခွဲထုတ်ကာ တစ်နှစ်တာ ဘလော့အဝါ့ဒ် (Blog Award) ချီးမြှင့်ရန် ကြံစည် ကြလေ၏။ ထိုဘလော့အဝါ့ဒ် ဆုပေးပွဲကြီးသို့ တက်ရောက်မည့် အွန်လိုင်းဝရိုက်ထာ ဦးရေမှာ အနည်းလေး နှစ်သိန်းခန့် ရှိနေသည်ကို စာရင်းပြုစု သိရှိရသဖြင့် တက်ရောက်မည့် သူများအားလုံး ဝင်ဆန့်လောက်အောင် ကျယ်ဝန်းမည့် နေရာကို ရှာဖွေကြရာ နောက်ဆုံးတွင် အားလုံး တစ်ပေါင်းတည်း တက်ရောက် နိုင်မည့် မိုးယိုရေယို လယ်ကွင်းပြင် ကြီးထဲတွင် ကျင်းပရန် ဆုံးဖြတ်ကြ လေ၏။ ထို ဆုပေးပွဲ နှင့်အတူ တက်ရောက်သူများ စိတ်ဝင်တစား ရှိစေရန် နာမည်ကျော် အွန်လိုင်း ဝရိုက်ထာကြီး နှစ်ဦးဖြစ်သည့် သူရဿဝါ (သူများနာမည် ထည့်ရေးရင် အဆဲခံရမှာကိုး) နှင့် တိုတိုတုတ် (စော်ဘွားကြီးကုန်း) တို့၏ အထူး ဘလော့ပြိုင်ပွဲ ကိုပါ ပူးတွဲကျင်းပရန် ထည့်သွင်း ကြေငြာ လိုက်လေရာ ကားပွဲစားဝင်းနေ၊ လေဆိပ်၊ ဆိုက်ကားဂိတ် မကျန် (လှည်းနေ လှေအောင်း မြင်းဇောင်းမကျန် ဆိုတာက ဒိတ်အောက် သွားပြီ) စိတ်ဝင်တစား ရှိနေကြ လေသည် ဟူ၏။

ဘလော့အဝါ့ဒ် ပေးမည့်နေ့သို့ ရောက်သော အခါတွင် ဆုပေးပွဲ ကျင်းပရာ မိုးယိုရေယို လယ်ကွင်းပြင် ကြီးထဲသို့ ခန့်မှန်း ထားသည်ထက် များပြားသော အွန်လိုင်းဝရိုက်ထာများ တဖွဲဖွဲ ရောက်ရှိလာကြ လေ၏။ တစ်နှစ်တာ ဘလော့ အဝါ့ဒ် ဆုပေးပွဲ စတင်ကျင်းပ သောအခါ ဆုကြေငြာသူက ၄င်း၏ လက်ထဲရှိ အီးမေးလ်ဟူသော စာအိတ်ကြီးကို ဖွင့်၍ဖတ်ကာ တစ်ဆုချင်း ကြေငြာသမှု ပြုလေသည်။ ပထမဆုံး အနေဖြင့် တစ်နှစ်တာ အကောင်းဆုံး ဂီတဘလော့ ဆုကို ကြေငြာရာ နာမည်ကျော် အဆိုတော်မလေး ဂျင်းနီ၏ ဆွေမျိုးနီးစပ် တော်သူ အွန်လိုင်းဝရိုက်ထာလေး မျောက်ဖင်နီမှ “အိမ်သာခွက်ထဲမှာ မောင့်မျက်နှာလေး” ဟူသော သီချင်း ဘလော့ဖြင့် ဆုရရှိ သွားလေ၏။ ထပ်မံ၍ တစ်နှစ်တာ အချစ် အလွမ်း ဇာတ်ကြမ်း ဘလော့ ဆုကို ကြေငြာရာ နာမည်ကျော် ဒဏ္ဍာရီ ဇာတ်ကောင်များ ဖြစ်ကြသည့် မယ်ကုဝဏ်၊ အာဠာဝကနှင့် ဒဿဂီရိ တို့ကို ဇာတ်ကောင် ထား၍ ရေးသားသည့် “ရုပ်ဆိုးတာ အပြစ်လား” ဟူသော ဘလော့ကို ရေးသားသည့် ဝါရင့် အွန်လိုင်း ဝရိုက်ထာ ချစ်တုံးကြီးက ရရှိလေသည်။ ထို့နောက် တစ်နှစ်တာ အကောင်းဆုံး အိုင်တီ နည်းပညာ ဘလော့ဆုကို အွန်လိုင်း ဝရိုက်ထာလေး ကိုကိုဗိုင်းရပ်မှ “ရှပ်ဒေါင်းနှိပ်ရင် ပိတ်သွားရော” ဘလော့ဖြင့် ဆွတ်ခူး သွားလေ၏။ တစ်နှစ်တာ အကောင်းဆုံး သတင်းဘလော့ ဆုကို နာမည်ကျော် သတင်းထောက် ဥက္ကာကိုကို (သံတွဲ) ၏ ညီဖြစ်သူ အုတ်ကွာကိုကို (သံခဲ) မှ ရရှိပြန်၏။

တဖန် တစ်နှစ်တာ အကောင်းဆုံး စားသောက်ဖွယ်ရာ ဘလော့ဆုကို “လိပ်ခေါင်းဟင်းချိုနဲ့ ငါးရှဥ့်ဘောက်ဖတ်” ဘလော့ကို ရေးသားသည့် ဝရိုက်ထာမလေး “ဝဝလှ” က ထိုက်ထိုက်တန်တန် ရရှိလေသည်။ အကောင်းဆုံး ကိုယ်ရေးအတ္ထုပတ္တိ ဘလော့ဆုကိုမူ နာမည်ကျော် အွန်လိုင်းဝရိုက်ထာ ဖြစ်သည့် ကျော်ညိုသွေးက “ဂေါ်အပျိုလေးတွေ အော်ငိုပြေးမယ့် ကျော်ညိုသွေး” ဟူသော ဘလော့ဖြင့် ရရှိသွားပြန်၏။ နောက်ဆုံးဆု ဖြစ်သည့် ဘဝသရုပ်ဖော် ဘလော့ ဆုကိုမူ “ကေတီဗီမှ အပြန် ..” ဟူသော ဘလော့ကို ပူးပေါင်း ရေးသားသည့် အမြွှာပူး အွန်လိုင်းဝရိုက်ထာ ညီအစ်ကို နှစ်ဦးဖြစ်သော “မျက်ရည်” နှင့် “မျက်ခွက်” တို့က ပူးတွဲ ရရှိသွားလေသည်။ ထို့နောက် ပရိသတ် စိတ်ဝင်စားခြင်းကို အခံရဆုံးသော အွန်လိုင်းဝရိုက်ထာ သူရဿဝါနှင့် တိုတိုတုတ် (စော်ဘွားကြီးကုန်း) တို့၏ အထူး ဘလော့ပြိုင်ပွဲ ကြီးကို စတင် ကျင်းပလေ၏။ ပြိုင်ပွဲ၏ စည်းမျဉ်းမှာ မိမိရေးသားသော ဘလော့တွင် “အံ့သြ ထိတ်လန့်မှု၊ ဘာသာရေး ကိုင်းရှိုင်းမှုနှင့် အာမေဋိတ် ပြုရလောက်သည့် အကြောက်တရား” တို့ကို ပေါ်လွင်အောင် ဖော်ပြ ရေးသား နိုင်ရမည် ဟူသော ထူးဆန်းသည့် စည်းမျဉ်း ဖြစ်လေ၏။

အွန်လိုင်းဝရိုက်ထာလေး သူရဿဝါမှာ ထိုအကြောင်းအရာ သုံးခုစလုံး ပါဝင်အောင် မည်သို့မည်ပုံ ရေးသား ရအံ့နည်းဟု ထုံးစံအတိုင်း မျက်မှောင်ကြီး ကျုံ့၍ စဉ်းစား နေခိုက်တွင် တိုတိုတုတ် မှာမူကား တစ်စက်လေးမှ မစိုးရိမ် သည့်အလား အေးအေးဆေးဆေး ဒူးနန့်၍ လက်သည်းကလေး ကိုက်နေလေ၏။ ထို့နောက် စတင် ယှဉ်ပြိုင် ကြရာ နာမည်ကျော် စာရေးဆရာလေး သူရဿဝါကို ပရိသတ်က တခဲနက် အားပေးနေ ကြသည့် အလျောက် သူရဿဝါ မှာမူကား ခေါင်းပင် မဖော်နိုင်အောင် တကုပ်ကုပ် ရေးသား နေသော်လည်း တိုတိုတုတ် မှာမူ စာလုံးကလေး လေးငါး ခြောက်လုံးမျှ ရေးပြီးသည်နှင့် သူ၏ ပြိုင်ပွဲဝင် ဘလော့ ပြီးဆုံးလေပြီဟု အချက်ပြရာ ပြိုင်ပွဲ ကြည့်ရှုသူ အားလုံး အံ့သြဘနန်း ဖြစ်ကြရ လေ၏။ တကုပ်ကုပ် ကြိုးစား ရေးသားနေသော သူရဿဝါကို အချိန် တော်တော်ကြာမျှ စောင့်ဆိုင်း ကြရပြီးနောက် ရေးသားမှု ပြီးစီးသွားသည်တွင် အကဲဖြတ် ဒိုင်များမှ ပြိုင်ပွဲဝင် ဘလော့နှစ်ပုဒ်ကို ဖတ်ရှု အမှတ်ပေး ကြလေ၏။ ပြိုင်ပွဲများ၏ ထုံးစံအတိုင်း အကဲဖြတ် အမှတ်ပေး နေစဉ် အချိန်အတွင်း ပြိုင်ပွဲကို စပွန်ဆာ ပေးထားသော နက်ဂိုက်ဂျာနယ်နှင့် မိုဘိုင်းဂိုက် ဂျာနယ်၏ အယ်ဒီတာမလေး ဇင်ဇင်ဇော်မင်းမှ စင်ပေါ်တက်၍ မော်ဒယ်ရှိုး လျှောက်ကာ ဂျာနယ် နှစ်စောင်ကို ကြေငြာသမှု ပြုလေ၏။

ထို့နောက် အမှတ်ပေး ဒိုင်များမှ ဆုရမည့် ဘလော့ကို ကြေငြာရာတွင် “သူရဿဝါဟာ ပြိုင်ပွဲဝင် ဘလော့ကို အချစ် အလွမ်း ဂမ္ဘီရ လျှို့ဝှက်သည်းဖို ဖြစ်ရပ်မှန် စွန့်စားခန်း စတဲ့ ရသပေါင်းစုံ ပါဝင်အောင် စာမျက်နှာ ငါးရာတိတိ ရေးသား ယှဉ်ပြိုင်ခဲ့ပြီး အရမ်းလည်း ကောင်းမွန်လှတဲ့ ဘလော့ ဖြစ်လို့ ဆုပေးဖို့ ထိုက်တန်ပါတယ်” ဟု ပြောရာတွင် အားပေးသည့် ပရိသတ်များက “ဟေး …” ခနဲ အော်၍ လက်ခုပ် လက်ဝါးတီး အားပေးကြ သော်လည်း ကြေငြာသူမှ “ဒါပေမယ့် …” ဟု ဆက်ပြောသဖြင့် ငြိမ်သွားကြပြီး ဆက်နားထောင် ကြရလေ၏။ “ဒါပေမယ့် … တိုတိုတုတ် ကတော့ သတ်မှတ်ထားတဲ့ စည်းမျဉ်းအတိုင်း အံ့သြ ထိတ်လန့်မှု၊ ဘာသာရေး ကိုင်းရှိုင်းမှုနှင့် အာမေဋိတ် ပြုရလောက်တဲ့ အကြောက်တရား စတာတွေကို စာလုံး ခြောက်လုံးတည်း သုံးပြီးတော့ အဓိပ္ပါယ် အပြည့်ဝဆုံး ဘယ်သူမှ မငြင်း နိုင်အောင် ရေးပြ သွားတဲ့အတွက် တိုတိုတုတ် (စော်ဘွားကြီးကုန်း) ကို ဆုပေးဖို့ ဆုံးဖြတ်လိုက် ပါတယ်” ဟု ကြေငြာ လေ၏။ ထိုအခါ ပရိသတ်များ ထံမှ မကျေမနပ် အသံများ ထွက်ပေါ် လာလေသဖြင့် အကဲဖြတ် အဖွဲ့မှ တိုတိုတုတ် ရေးသား ထားသော ပြိုင်ပွဲဝင် ဘလော့ကို လက်တွေ့ ပြသသော အခါမှ မငြင်းနိုင် လောက်အောင် အဓိပ္ပါယ် ပြည့်ဝပြီး သတ်မှတ် စည်းမျဉ်း သုံးခုလုံး ပါဝင်သည့် “အလို … ဘုရား ဘုရား” ဟူသော စာလုံး ခြောက်လုံးပါ ဆုရဘလော့ကို လက်ဖျားခါ လောက်အောင် တွေ့ရှိရလေ၏။ ထို့နောက် ဆုရရှိသူ တိုတိုတုတ် (စော်ဘွားကြီးကုန်း) မှ ပရိသတ်များကို ထုံးစံအတိုင်း ကျေးဇူးတင်စကား ပြောကြားလေရာ နာမည်ကိုက တိုတိုတုတ် ဖြစ်သည့် အားလျော်စွာ မိုက်ခွက်ကို ကိုင်၍ ပရိသတ်ကို မိုက်ကြည့်ကြည့်ကာ “ကျေးဇူး … ဒါပဲ” ဟု ခပ်ပြတ်ပြတ် ကျေးဇူးတင်စကား ပြောကြား ပြီးသည်၏ နောက်တွင် ဘလော့ဆရာများ၏ တစ်နှစ်တာ အကောင်းဆုံး ဘလော့ဆုပေးပွဲနှင့် အထူးဘလော့ပြိုင်ပွဲကြီး အသံဗလံ ပေါင်းစုံဖြင့် အောင်မြင်စွာ ပြီးဆုံး သွားလေ သတည်း။

(မှတ်ချက်။ အထက်ပါ ဆောင်းပါးထဲတွင် ချစ်ခင်ရသော စာပေညီအစ်ကို အချို့ကို နာမည်တပ်၍ ထည့်သွင်း ရေးသားထား ခြင်းမှာ ကျီစယ်လိုသည့် သဘောသက်သက်သာဖြစ်ပြီး လှောင်ပြောင်စော်ကားလိုခြင်း အလျဉ်းမရှိပါကြောင်း)

 

သူရဿဝါနှင့် ဝက်ဋီကာ

“သူရဿဝါနှင့် ဝက်ဋီကာ”

ကျွန်ုပ်တို့ ပျော်မွေ့ကျက်စားရာ အင်တာနက် လောကကြီး တစ်ခုလုံးသည်ကား ယနေ့ခေတ် အချိန်အခါတွင် ဝက်များဖြင့် ဖုံးလွှမ်းလျက် ရှိသော ဝက်ကမ္ဘာကြီး၊ ဝက်ခေတ်ကြီး ဖြစ်၍ နေချေပြီ။ ကျွန်ုပ်ဆိုလိုသော ဝက်ဆိုသည်မှာ အသင်တို့ သိထားသည့် နားရွက်ကား၊ အမြီးကောက်၊ နှာခေါင်းထော်သည့် ဝက်အကောင်များ မဟုတ်ပါပေ။ အနောက်တိုင်း ဘာသာစကား အလိုအရ ဝက်ဘ်ဆိုက် (Website) ဟူသည့် အသံထွက်ကို ကျွန်ုပ်၏ ပိရိခန့်ညား လှစွာသော မထော်မနန်း ပရိုနောင်ဇေးရှင်းဖြင့် မန်းမှုတ်သောကြောင့် ထွက်ပေါ်လာသည့် ဝက်ဖြစ်လေသည်။ ၄င်းဝက် တို့ကို တီထွင်ရေးသား ဖန်တီးအပ်သည့် ဥာဏ်ကြီးရှင် များအား ဝက်ဒဗလုပ်ပါ ဟုခေါ်တွင်ကြပြီး အနှီသူတို့မှာ ၄င်းဝက်များကို လူအများ သုံးစွဲနိုင်အောင် မွေးထုတ် ပေးကြခြင်း ဖြစ်သောကြောင့် ဝက်သမိခင် ဝက်သဖခင်များ ဟုလည်း ခေါ်ဆို ဂုဏ်ပြု အပ်ပေသည်။ နောက်တစ်မျိုး မှာကား ထိုဝက်များ၏ အပြင်အဆင် အရောင်အသွေး တို့ကို ရောစပ် ခြယ်သ ပေးသူများ ဖြစ်ပြီး ၄င်းတို့ကိုမူ ဝက်ဒီဇိုင်နာ ဟုဖြစ်ပေ၏။ ထိုသူတို့မှာကား ဒီဇိုင်းအမြင် ရှိရ၍ ထိုဝက်များကို လှလှပပ ကြည့်ပျော် ရှုပျော် ဖြစ်အောင် ပြင်ဆင် ပေးသူများ ဖြစ်သဖြင့် ဝက်အလှဖန်တီးရှင် ဟုလည်း ခေါ်ဆို အပ်လေသည်။ နောက်ထပ် ရှိသေးသည် မှာကား အမျိုးမျိုးသော ဝက်ခြံ (Website) များကို ထိန်းသိမ်း စောင့်ရှောက်၍ လူအများ သုံးစွဲနိုင်အောင် နောက်ကွယ်မှ နည်းနစ်ပိုင်း ဆိုင်ရာများ ကြိုးကိုင် လှုပ်ရှား ပေးကြသူ များမှာ ဝက်သခင် (Web Master) ဖြစ်ပေ၏။ ထိုသို့သော ဝက်များကို သုံးစွဲကြသည့် လူအများကို စောင့်ကြည့်၍ ထိန်းချုပ်မှု ပြုကြသူများမှာ ဝက်ထိန်း (Web Administrator) များ ဖြစ်ကြပေ၏။ ကျွန်ုပ်အနေနှင့် ဤမည်သော သြကာသ အင်တာနက် လောကကြီး အတွင်းတွင် ဂျောင်းဂျောင်းပြေး လည်ပတ် လှုပ်ရှားရသည့် အချိန်ကာလ အတန်ကြာ လာသည်နှင့်အမျှ ဤကဲ့သို့ အမျိးမျိုး အထွေထွေသော ဝက်တို့ကိုလည်း တွေ့မြင် ကြုံဆုံ ခဲ့ဖူးသည် ဖြစ်လေ၏။

၎င်းတို့အနက် တစ်ခုသော အမည်တပ်၍ ရသည်မှာ အော်ဖစ်ရှယ်ဝက် (Official Web) ဖြစ်လေ၏။ လူသိများ ထင်ရှားသော ဆယ်လီဘရီတီများ၊ အနုပညာရှင်များ၏ အလှပြ ဓါတ်ပုံများနှင့် ၄င်းတို့၏ လက်ရှိ လှုပ်ရှားမှု အနည်းငယ် တို့ကို သိသာ ထင်ရှားစွာ ဖော်ပြထား သောကြောင့် အော်ဖစ်ရှယ်ဝက် အမည်တပ်ရခြင်း ဖြစ်ကာ အချို့မှာ နိုင်ငံကျော် ဝက်များ ဖြစ်၍ အချို့မှာ ကမ္ဘာကျော် ဝက်များ ဖြစ်ပြီး အတော်အတန် အရာရောက် ကြသဖြင့် လူတွင်ကျယ် နည်းတူ ဝက်တွင်ကျယ်များ ဖြစ်ကြလေ၏။ နောက်တစ်ခု မှာကား တွစ်တာ၊ ဖေ့ဘုတ်တို့ ကဲ့သို့သော ဝက်များ ဖြစ်ကြကာ ကမ္ဘာ တလွှားမှ လူအများ လူမှုရေး၊ စီးပွားရေး၊ နိုင်ငံရေးတို့ကို အချင်းချင်း ဖလှယ်နှီးနှော၍ သတင်းနှင့် အတင်းကို ရောတုပ် ကုန်ကြသည့် ဝက်များဖြစ်ပြီး ဆိုရှယ်ဝက်ဟု အမည်တပ်သော် ရလေ၏။ ထိုဆိုရှယ်ဝက် တို့မှာမူကား အခြားဝက်များ နှင့်မတူ တမူထူး၍ အတော်အတန် စကားများသော၊ အရေးအရာ ကိစ္စစုံလင်သော ဝက်လည် ဝက်ရှုပ်များ ဖြစ်ကုန်၏။

ကျွန်ုပ်ထပ်မံ၍ သတိပြုမိသော ဝက်တစ်မျိုးမှာ နည်းပညာဝက် ဖြစ်၏။ ထိုဝက်တို့မှာ သူမတူအောင် နှံ့စပ် တတ်ကျွမ်း၍ အိုင်တီ နည်းပညာဆိုင်ရာ အဆင့်မြင့် ပညာရပ်များ၊ လူအများအတွက် အသုံးဝင်သည့် ဝဲပျော့ (Software) များ၊ ဝဲမာ (Hardware) များ အကြောင်းကို လက်ဆင့်ကမ်း မျှဝေသော အကျိုးရှိသည့် ဝက်များပင် ဖြစ်လေ၏။ ၄င်းတို့ကိုမူ ဝက်ပညာရှိများဟု ခေါ်သော် ရနိုင်လေသည်။ နောက်တစ်မျိုးမှာကား လူတကာနှင့် မတည့်သော ဝက်များ ဖြစ်လေ၏။ အဘယ်ကြောင့်ဆိုသော် ၄င်းတို့သည် အဝတ်အစားဖိုး မတတ်နိုင်သော မိန်းမပျိုများ၊ ယောင်္ကျားပျိုများ၏ ကြည့်မတော် ရှုမတော်သော ပုံရိပ်များ၊ ဗီဒီယိုဖိုင်များဖြင့် ပြည့်နှက်၍ နေသောကြောင့်ပင်။ ထိုဝက်အမျိုးအစားမှာ 18 + ဟု ခေါ်တွင်၍ အသက် ၁၈ နှစ်ကျော် လူပျိုဘဝ ရောက်သူများမှ ကြည့်ရှုခွင့် ရှိသဖြင့် ကာလသားဝက်များဟု ခေါ်လျှင် ရနိုင်မည် ဖြစ်ပေ၏။ ထို့အပြင် ကမ္ဘာတခွင် မြန်မာတခွင် ပြဲပြဲစင်အောင် စပ်စု၍ ထိုသတင်းစုံတို့ကို ပြန်လည် ဖော်ပြသည့် ဝက်များလည်း ရှိလေ၏။ ကမ္ဘာ၏ မည်သည့် နေရာတွင် ဘာဖြစ်နေနေ လူအများ ချက်ခြင်းလိုလို သိရှိရအောင် အုတ်အော်သောင်းနင်း ဖော်ကောင်လုပ် လောဆော်သည့် ထိုဝက်များကို လော်စပီကာဝက် ဟုခေါ်တွင်လေ၏။

ထို့အပြင် ကွန်ပျူတာ စက်ထဲတွင် ထည့်သွင်း အင်စတော လုပ်၍ ဆော့စရာ မလိုဘဲ အွန်လိုင်းပေါ်တွင်ပင် ဆော့ကစားခြင်း အမှုကို ပြုနိုင်သော ဂိမ်းဝက်များလည်း ရှိသေး၏။ အနီးတွင်ရှိသော ကီးဘုတ်၊ မောက်စ်တို့ကို အသုံးပြု၍ တစ်နေကုန် တွီတွီတွမ်တွမ်ဖြင့် မျောက်ရှုံးအောင် လက်ဆော့ခြေဆော့ လုပ်နေ၍ ရသဖြင့် ၄င်းတို့ကိုကား မျောက်တူဝက်တူ ဟုခေါ်သော် ရ၏။ ထို့အပြင် ၄င်းအွန်လိုင်းပေါ်ရှိ ဝက်စာရွက် (Web Page) များတွင် ဝါသနာအရ စာရေးသားမှု ပြုကြသူတို့ကို ဝက်စာရေးဆရာများဟု ခေါ်တွင်၍ အွန်လိုင်းရှိ သတင်းဝက် များပေါ်တွင် ဖော်ပြမည့် သတင်းများ ရေးသားသူ တို့ကိုမူ ဝက်သတင်းထောက် များဟု ခေါ်တွင် လေသည်။ ထို့အပြင် ဖော်ပြပြီးအပ်သော ဝက်စာရွက် (Web Page) များ၏ အားနည်းမှု၊ လုံခြုံရေး ချို့ယွင်းမှု တို့ကို အသုံးချကာ အချက်အလက်များ ဖောက်ထွင်း ခိုးယူသူများကို Hacker (သို့မဟုတ်) ဝက်နင်ဂျာ ဟုလည်း နာမည်တပ်၍ ရနိုင်ပေ၏။

မည်သည့် ဝက်တွင်မဆို ကိုယ်ပိုင် အမည်ပေါက် နာမည်များ ရှိကြပြီး အမည်နာမ များလည်း မတူကွဲပြား ခြားနားကြလေ၏။ ဥပမာ ဆိုရသော် အော်ဖစ်ရှယ်ဝက် အမျိုးအစား ထဲတွင်ပင် သူရဿဝါဝက်၊ ရှာကီရာဝက်၊ ဂျပ်စတင်ဘီဘာဝက် စသဖြင့် အမည်ခွဲခြား ထားကြခြင်း ဖြစ်လေ၏။ ထိုဝက်များ နေစရာ နေရာအတွက်မူ ဟိုစတင်ခေါ် ကိုယ်ပိုင် ဝက်ဋ္ဌာနေ များလည်း ရှိကြသည် ဖြစ်၏။ ဤသည်မှာကား ကျွန်ုပ်လေ့လာ စပ်စုသိရှိ ထားသမျှသော ထွေလီကာလီ ဝက်ပေါင်းစုံ အကြောင်း ဖြစ်ပြီး ကျွန်ုပ်တို့အားလုံးသည် နေ့စဉ်နေ့တိုင်း ဝက်ကမ္ဘာကြီး အတွင်းတွင် ပြေးလွှား လှုပ်ရှား၍ နေကြသည့် ဝက်လောကသားများ ဖြစ်ကြောင်းကို ယခုဖတ်ရှုနေသည့် ကျွန်ုပ်၏ ချစ်ခင်လှစွာသော ဝက်စာဖတ်သူများ သိရှိစေရန် ရည်သန်၍ ရေးသားပြုစုအပ်သည့် ဝက်ဋီကာကြီး ဖြစ်ပေတော့သတည်း။

သူရဿဝါနှင့် Facebook

“သူရဿဝါနှင့် Facebook”

ဒီဖက်ခေတ် အင်တာနက် လေလှိုင်း လောက၏ ပြိုင်စံရှား ဇာတ်လိုက်ကျော်ကြီး တစ်ဦးမှာ ဟိုဘရုတ်ကလေး ဇူကာဘတ် စပ်စပ်ဆော့ဆော့ လုပ်ခဲ့သော Facebook ပင်ဖြစ်၏။ လူသားတွေ ဒီအင်တာနက် ဆိုတာကြီးကို ယခုလို လျှောလျှောရှူရှူ သုံးခွင့်ရအောင် (အင်တာနက် စပိဒ် နေမကောင်း ဖြစ်ရင်တော့ မလျှောမရှူ ဘူးပေါ့လေ) တီထွင် ကြံဆ ခဲ့ကြသော စွန့်ဦးတီထွင် ပုဂ္ဂိုလ်ကြီး များကိုသာ မသိလျှင် မသိဘဲ ရှိရမည်။ Facebook ကိုတော့ မသိသူ မရှိ။ ဒီလောက်ပင် Facebook က အောင်မြင်နေ၏။ ယခု Google မှ လွှင့်တင်သော Google Plus သည် Facebook ကို အဓိက ယှဉ်ပြိုင်မည့် လူမှုရေးကွန်ယက် ဖြစ်လာနိုင်သည် ဆိုသော်လည်း နောင်ဖြစ်မည့် ကိစ္စ နောင်မှသာရှင်း။ အခုလောလောဆယ်တော့ Facbook က ပန်းပန်လျှက် ရှိဆဲ။ အောင်မြင်တာလည်း မပြောနှင့်လေ။ သွေးစုနာ အပေါက်ခံပြီး ဖင်တစ်ထိုင်တည်း အင်တာနက် သုံးနေနိုင်မည် ဆိုလို့ကတော့ Facebook ထဲမှာပင် ဒုတိယဘဝ အနေနှင့် တစ်အိုးတစ်အိမ် ထူထောင်လို့ ရလောက်သည်။

ပြောခဲ့သလို Facebook မှာပင် တစ်အိုးတစ်အိမ် ထူထောင်၍ ဆွေမျိုးစပ်ကာ သိုက်သိုက်ဝန်းဝန်း နေကြပုံလေး ကြည့်ပါစို့။ သူရဿဝါ၏ သူငယ်ချင်း တစ်ယောက်ဆိုလျှင် သူ့၏ Facebook Profile ဘယ်ဖက်ခြမ်းတွင် သူ၏ ဆွေတော် ရှစ်သောင်း မျိုးတော်ပေါင်းကို စာရင်းပြုစု ထားလေ၏။ တကယ့် အပြင်က ဆွေမျိုးများလား ဆိုတော့ မဟုတ်။ သူ့လိုပင် Facebook သုံးကြသည့် သူငယ်ချင်းများအား အဖေတစ်နေရာ၊ အမေတစ်နေရာ၊ အဘိုးအဘွား၊ ဦးလေး အဒေါ် ကိုကိုမမ စသဖြင့် အွန်လိုင်းဆွေမျိုး အဖြစ် စပ်ယှက်ထားခြင်း ဖြစ်လေ၏။ သူရဿဝါပင် သူ့ယောက်ဖ နေရာမှာ ပါနေသေး တော့သကိုး။ ဒါပေမယ့်လည်း အထင်မသေးနှင့် .. အပြင်လောကမှ သူ့ဆွေမျိုး အစစ်တွေပင် အွန်လိုင်းဆွေမျိုး များလောက် များပြားမည် မထင်။ Facebook ၏ လွှမ်းမိုးမှုကား ဒါတင်မကသေး .. ။

နောက်တစ်ခုက Facebook မှာ ဆော့၍ ရသော ဂိမ်းတွေ။ Facebook သုံးသူ အတော်များများ အဲဒီ Facebook ထဲမှ ဂိမ်းတွေနဲ့ မကင်းရာ မကင်းကြောင်း ရှိကြသည်။ ပထမတော့ ဟုတ်တုတ်တုတ် ရယ်ပါ။ မာဖီးယား လူဆိုးဂိုဏ်းကို အခြေပြု၍ မိုက်မိုက်ကန်းကန်း အထက်စီးဆန်ဆန် ဆော့ကြသည်။ ပိုက်ဆံတွေ၊ လက်နက်တွေ ရလိုက်ကြတာ သောက်သောက်လဲ .. အပြင်မှာတော့ မဟုတ် .... ဂိမ်းထဲမှရသည့် ပိုက်ဆံတွေ။ နောက်ပိုင်း ကျတော့ လူဆိုးဂိုဏ်းမှ မာဖီးယားများ ဘဝကနေ ဘယ်လို ဘယ်လို မျက်စိလည် ကုန်ကြသည် မသိ။ စားသောက်ဆိုင် စားပွဲထိုးတွေ၊ လယ်သမား လက်လုပ်လက်စားတွေ ဖြစ်ကုန် ကြလေ၏။ နောက်ပိုင်း ဒီထက်ပို ကြံရာမရ ဖြစ်၍ ဒီထက်ပို ပိုက်ဆံပြတ် လာကြသော အခါတွင် Friend For Sale ဟူသော ဂိမ်းထဲဝင်၍ Facebook ထဲမှ မြင်မြင်ကရာ သူငယ်ချင်းတို့ကို လက်ညှိုးထိုး၍ ရောင်းစား ကြလေသည် ဟူ၏။ သြော် .. ရှာရှာဖွေဖွေ ဆွဲဆောင်လွန်းသည့် Facebook ပါပေ။

၎င်း Facebook သည် လူမှုရေး ကွန်ယက်ဆိုက် အဖြစ် သာမက Photo Gallery အဖြစ်လည်း အသုံးချချင် ချနိုင်သည့် အနေအထား ဖြစ်၏။ အချို့ သူငယ်ချင်း ကောင်မလေးများ ဓါတ်ပုံတွေ ရိုက်၍ တင်ထားလိုက် ကြသည်မှာ ပုံစံမျိုးစုံ၊ ဂိုက်မျိုးစုံ .. စမတ်ကို ဂွမ်လို့။ မြန်မာဆန်ဆန် အကျီ င်္လေးနဲ့ ထမီလေးနဲ့ ဝတ်ပြီး ဘုရားပေါ်မှာ ရိုက်လာတဲ့ ပုံလေး ဒီနေ့တင်ထား၊ နောက်နေ့ သွားကြည့်တော့ နောက်တစ်ပုံ ဖြစ်နေပြီ။ မနေ့ကနဲ့ မဆိုင်ရေးချ မဆိုင်။ မိန်းကလေး တန်မဲ့ ဆံပင်တွေ ထောင်လို့၊ မျက်ကွင်းကြီးတွေ မည်းလို့၊ နှုတ်ခမ်းနီ အမည်းကြီးတွေ ဆိုးလို့။ တချို့ ကျပြန်တော့ Facebook မှာ ဓါတ်ပုံတင်ရတာ ဘယ်လောက်ထိ ဝါသနာ ပါသည်မသိ။ သူတင်ထားသည့် ဓါတ်ပုံတွေ တစ်နေကုန် ထိုင်ကြည့်၍ မပြီး။ အမယ် .. ရိုးရိုးတန်းတန်းတောင် တင်ထားသည် မဟုတ်။ ဇာတ်လမ်း ကလေးနဲ့။ သူ့ငယ်ဘဝ ဓါတ်ပုံများ ကနေစ၍ အပျိုပေါက် ကလေး ဖြစ်လာပုံ၊ နောက် .. တက္ကသိုလ် ကျောင်းသူ ဘဝမှ စ၍ ခိုးရာ လိုက်ပြေးပုံ အဆုံး အကုန်လုံး တင်လေသည် ဟူသတတ်။ ဒါလည်း Facebook မှ လူမှုရေး ယဉ်ကျေးမှု တစ်ရပ် ဖြစ်မည်ဟု နှလုံးသွင်းမိသည်။

နောက်ထပ် အတန်းအစား တစ်မျိုးကတော့ ခုနက ပြောသလို ဂိမ်းလည်း မဆော့၊ ဓါတ်ပုံလည်း မတင်၊ တွေ့ကရာ နေရာ အကုန် Like လုပ်ကာ အေးအေးဆေးဆေး သောင်းကျန်း ကြသူများ ဖြစ်၏။ သူရဿဝါ ခံရဖူးသည်။ တစ်ရက်က စိတ်ဓါတ်ကျလွန်း၍ Facebook မှာ Status လေး ရေးတင်မိသည်။ “ခေါင်းတွေလည်းကိုက်၊ အအေးလည်းမိ၊ ချောင်းလည်း ဆိုးနေတယ်၊ တစ်ကိုယ်လုံးလည်း ကိုက်ခဲ နေတာပဲ၊ စိတ်ညစ်တယ်၊ သေချင်တယ်” ဟူ၍။ အဲဒါကို စာလည်း သေချာ ဖတ်ဟန်မတူဘဲ Like လုပ်သွားသည်။ မသိရင် ကိုယ်က နေမကောင်း ထိုင်မကောင်းလို့ စိတ်ညစ်ပြီး သေချင်တယ် ငြီးငြူတာကို သူကပဲ သဘောကျသလို၊ ထောက်ခံသလို ဖြစ်နေသည်။ ဒါပေမယ့်လည်း ဘယ်တတ်နိုင်မလဲလေ။ Like Button ပဲ နှိပ်လို့ ရတာကိုး။ နှိပ်လို့ ရတာလေး နှိပ်ပြီး အားပေး သွားပုံ ရပါသည်။

ဘယ်လိုပြောပြော Facebook ကတော့ အင်တာနက် သုံးသူများကို အတော်ပင် လွှမ်းမိုးထားတာ အမှန်အကန် ဖြစ်၏။ မနက် မိုးလင်းတာနဲ့ မျက်လုံး နှစ်လုံး အစုံအစေ့ပင် မဖွင့်ရသေးခင် Facebook ပြေးဖွင့်သည်အထိ စွဲလမ်းနေသူများ အပုံအပင်။ အပြင်မှ အလုပ်အကိုင်များ အပျက်ခံပြီး Facebook ထဲ ဘဝမြှုပ်နှံကာ လယ်သမား လုပ်နေသူတွေ ဒုနဲ့ဒေး။ ဘာပဲဖြစ်ဖြစ် ကျွန်တော်တို့ အားလုံး လူမှုရေး ကွန်ယက် ဆိုသည့် အတိုင်း ၄င်းလူမှုရေးများ စုပြုံရှုပ်ထွေး နေသည့် Facebook ကွန်ကြီးအတွင်း လိပ်ကလေးတွေလို အခုထိ ယက်ကန် ယက်ကန် ဖြစ်နေကြခြင်းမှ လွတ်မြောက် နိုင်ဖို့ရာ အဆင်သင့် မဖြစ်ကြသေးတာ သေချာနေလေသည်။

သူရဿဝါနှင့် ဟက်ကာ

“သူရဿဝါနှင့် ဟက်ကာ”

ကျွန်တော်တို့ အင်တာနက် သုံးစွဲသူများ၏ လောကမှာ အားလုံးလိုလို ကြောက်ရွံ့ရသော လူတန်းစား တစ်ရပ် ရှိသည်။ ဟက်ကာ (Hacker) ဖြစ်၏။ အင်တာနက် သုံးတတ်ခါစ ကိုယ့်ရှေ့မှ စီနီယာ ကိုကိုမမ များက မိမိတို့၏ စကားဝှက်များ မပျောက်ပျက်ရန် အထူးထိမ်းသိမ်း စောင့်ရှောက်ခိုင်းသည့် အကြောင်းအချက် များထဲတွင် ထိုဟက်ကာ များကို ရည်ရွယ်သမှု အများဆုံး ပြုကြသည်။ သူရဿဝါတို့ ၄င်းဟက်ကာများကို ဘယ့်ကလောက်အထိ ကြောက်သနည်း ဆိုသော် ကိုယ်တိုင်လည်း အဟက်မခံရဖူး၊ ကိုယ့်ဘေး ပတ်ဝန်းကျင်ရှိ လူများ အဟက်ခံ ရတာလည်း မမြင်ဖူး၊ ဟက်ကာ ဆိုတာ လုံးလုံးလား၊ ပြားပြားလား၊ ချိုပါသလား၊ အမြီးပေါက် နေသလား ဘာဆို ဘာမှကို မသိခင် ကတည်းက ကြားဖူး နားဝဖြင့် ကြိုကြိုတင်တင် ကြောက်ခဲ့ရသည်။ ကိုယ့်ထက် စီနီယာ တစ်ယောက်က ဆရာကြီး ဂိုက်ဖမ်း၍ မျက်နှာတည် မျက်နှာထားဖြင့် (တကယ်တော့ သူလည်း ဘာမှ လုပ်တတ်တာ မဟုတ်) “မင့် ... ငါ ဟက်ပစ် လိုက်ရမလား” ဟု လာပြောလျှင် ကိုယ့်မှာ နေစရာ မရှိတော့။ ဒီလောက်အထိ ဘာမှန်းမသိ ညာမှန်းမသိ ကြောက်ရွဲ့ ခဲ့ရသည်။

ကိုယ်တိုင် အင်တာနက်ပါး မဝခင် ကိုယ့်ကို စီနီယာများ စခဲ့ နောက်ခဲ့ ခြောက်ခဲ့သလို ကိုယ်ကိုယ်တိုင် Net တစ်လုံး Chat တစ်လုံး (လူတစ်လုံး သူတစ်လုံး သဘောတရား ဆောင်ပါသည်) ဖြစ်လာချိန်တွင် ကိုယ်ကလည်း ကိုယ့်ထက် ဝါနုသူများကို “ဟက်ပစ်လိုက်ရမလား” စကားသုံး၍ ပြန်လည် ခြောက်လှန့် ဖူးတာပဲ။ ဒါပေမယ့် သူရဿဝါတို့ ကံမကောင်းပုံများ ကိုယ်ပြန်၍ ခြိမ်းခြောက် မိသည့် သကောင့်သားက ဟက်ကာ ဆိုတာကို နံပြားလောက်ပင် စိတ်မဝင်စား မသိရှိသူ ဖြစ်နေ၏။ ခပ်တည်တည်နှင့် “မင်း Password တွေ သေချာ သိမ်းနော်၊ အမြင်ကပ် လာရင် မင့်ကိုငါ ဟက်ပစ် လိုက်ရမလား” ဟု ဖြဲခြောက်တော့ သင်းက မထုံတက်တေး မျက်နှာပေးနှင့် ဘာပြန်ပြောသည် ထင်ပါသလဲ။ “ကျွန်တော့် ဟပ်ရအောင် အစ်ကိုက ခွေးလား .. တဲ့”။ တစ်ခွန်းတည်း ... သို့သော် သူရဿဝါ တစ်သက်လုံး မှတ်သွားပါသည်။ ဘယ်သူ့ကိုမှ ဒီလို ထပ်ပြီး မခြိမ်းခြောက် တော့ပါ။

ကျွန်တော် ဖတ်ဖူး မှတ်ဖူး သလောက် ပြောရလျှင် ဟက်ကာအပြား လေးပါး ရှိပါသတဲ့။ အော် .... တစ်မျိုးတည်း သိခဲ့တုန်း ကတောင် နေစရာ မရှိတာ .. လေးမျိုး ရှိမှန်း သိသိချင်း သူရဿဝါ နှာရှူဆေး ပြေးရှူလိုက်မှ နေသာထိုင်သာ ပြန်ဖြစ်၏။ နောက်ပြီး ဟက်ကာ ထဲမှာတောင် ကောင်းသော ဟက်ကာနှင့် မကောင်းသော ဟက်ကာ ဆိုတာ ရှိသေးသတဲ့။ ဗုဒ္ဗေါ ...။ ခိုးကြတာချင်း အတူတူတောင် ငါက ဘုရား ရှိခိုးပြီးမှ ခိုးတဲ့ကောင်ကွဟု ကြွေးကြော်သလို ဖြစ်နေပါ ရောလား။ ဟက်ကာ အမျိုးမျိုး ရှိသလို ဟက်နည်း ဟက်ဟန် အမျိုးမျိုးလည်း ရှိသည်ဟူ၏။ သူတို့က Hack လုပ်ပြီ ဆိုလျှင် သူတို့ လုပ်သည်ကို ဖောက်ထွင်းသည်၊ ခိုးယူသည်ဟု ဘယ်တာ့မှ မကြေငြာ၊ တိုက်ခိုက်သည်ဟု ဂုဏ်သရေ ရှိရှိ ကင်ပွန်းတပ်၏။ မှတ်သားစရာ တစ်မျိုး တိုးရပါသည်။ ဘာပဲဖြစ်ဖြစ် ဟက်ကာ ဆိုသည့် လူများသည် အတော်အတန် တန်ခိုးထွား ကြသူများ ဖြစ်သလို ပညာတတ် လူတန်းစားများ ဖြစ်သည်ဟု ယူဆမိသည်။ တချို့ကတော့ ဒီလို အဆင့်မြင့် ပညာများနှင့် ပညာသား ပါပါ ဖောက်ထွင်း တိုက်ခိုက်တာလည်း မဟုတ်ဘဲနှင့် တစ်ပါးသူ အလစ်အငိုက်တွင် Key Logger လို ဆော့ဖ်ဝဲမျိုး Run ထားကာ အောက်တန်းကျကျ ခိုးကြပြီးမှ သူတို့ကိုယ် သူတို့ ဟက်ကာ အမည် တပ်သည်များလည်း ရှိ၏။

ယခင်က ပြည်ပ သတင်းများ တွင်သာ ဟက်ပစ်လိုက်သည်၊ အဟက် ခံရသည် ဟူသော သတင်းမျိုး ဖတ်ခဲ့ရ သော်လည်း ယခုတော့ ကိုယ့်နိုင်ငံ တွင်းမှာပင် တကယ် တော်သော၊ တတ်သော နည်းပညာရှင် အချို့က ဟက်ကာ များအဖြစ် ရပ်တည်၍ လာကြသည်။ ကိုယ့်အနီးအနား ပတ်ဝန်းကျင် မှာပင် ဘယ်သူ့ မေးလ်အကောင့်တော့ ပါသွားပြီ၊ ဘယ်ဝက်ဘ်ဆိုက်တော့ ခွက်ထိုးခွက်လန် အဟက်ခံ လိုက်ရသည် ဆိုတာမျိုး ခဏခဏ ကြားလာရ၏။ ဘာကြောင့် ဟက်ကြသလဲ ... သူရဿဝါ ဥာဏ်မှီသလောက် လိုက်စဉ်းစား ကြည့်မိသည်။ အချို့က ပုဂ္ဂိုလ်ရေး မကျေနပ်၍ ဟက်သည်၊ အချို့က အကြောင်းပြချက် မည်မည်ရရ မရှိဘဲ သူတစ်ပါး ကိုယ်ရေးကိုယ်တာ လုံခြုံရေးကို ထိပါးလို၍ ဟက်သည်၊ ဘယ်လိုပဲ ဖြစ်ဖြစ် အခြားတစ်ပါးသူ၏ ကိုယ်လုံခြုံရေး၊ စိတ်လုံခြုံရေးကို အနှောင့်အယှက် ပြုတာ မကောင်း ဟုတော့ ခံစားမိ၏။

ကိုယ့်အနီးအနား ပတ်ဝန်းကျင်တွင် အဟက်ခံရ ဖူးသူများ ထဲတွင်တော့ သိပ်ပြီး ဆိုးဆိုးရွားရွား ကိစ္စမျိုး ကြုံရသည်ဟု မကြားဖူး။ ကိုယ့် မေးလ်အကောင့် အဟက်ခံ လိုက်ရသည် ဆိုသော်လည်း မေးလ်ထဲတွင် သိပ်ပြီး အရေးကြီးသည့်၊ လျှို့ဝှက်အပ်သည့် အချက်အလက်များ မထားကြ သောကြောင့်ပင် ဖြစ်မည် ထင်သည်။ သူရဿဝါ ကတော့ အခု ဟက်ကာများ အကြောင်း ရေးသာ ရေးနေရသည်။ စိတ်ထဲမှာ သိပ်မသန့်။ တော်တော်ကြာ ဒီစာတွေကို ဟက်ကာ တစ်ယောက်ယောက်များ ဖတ်မိပြီး “ဒီအကောင်တော့ လှည့်ပတ် ရေးစရာ ကုန်သွားလို့ ငါတို့ကို ဆော်ပဟ” ဟု တွေးသွားပြီး လာဟက်လျှင် ဒုက္ခ။ ကိုယ်က ဟက်ကာများ အကြောင်း နည်းနည်းပါးပါး ဖတ်ရှုလေ့လာ ထား၍ နည်းနည်း ပါးပါး သိနေတော့ ဘာမှမသိသည့် ဟိုငရွတ် ကလေးလို ကျွန်တော့်ကို ဟပ်ရအောင် ခင်ဗျားက ဒိုဘာမင်လား၊ အယ်ဇေးရှင်းလား ပြန်မေး၍လည်း မဖြစ်။ တော်တော်ကြာ ရွဲ့သည်ဟု ဆိုကာ ရှောက်မြင်ကပ် ပုဒ်မနှင့် တစ်ဆုံးတစ ဟက်သွားလျှင် ... ဘုရား ဘုရား .. တွေးမိရုံနဲ့တင် ကြက်သီး ထမိပါသည်။

သည်တော့ကာ ... သူရဿဝါ ယခု ရေးထား သည်များမှာ ဟက်ကာများ အကြောင်းကို သိပ်သိနေ၍ မဟုတ်ပါ၊ ရမ်းသမ်းဖြီးဖြန်း နေခြင်း ဖြစ်ပါသည်။ ယခုစာကို ဖတ်မိကြကုန်သော ဟက်ကာအပေါင်း သူတော်ကောင်းတို့ ... အမိုက်အမဲလေးဟု သဘောထား၍ ဗွေမယူ ကြပါနှင့်။ မကျေနပ်၍ ဟက်မည် ဆိုလျှင်လည်း သူရဿဝါ မေးလ်ထဲတွင် ရည်းစားစာနှင့် အကြွေးစာရင်း များမှလွဲ၍ ဘာမှမရှိပါ။ အခန့်မသင့်လျှင် ထိုအကြွေးစာရင်း များကိုပင် သင်တို့ တာဝန်ယူ ရနိုင်ပါသည်။ ဒီစာမူကို လက်ခံ ဖော်ပြပေးသော Net Guide မှ အယ်ဒီတာကြီး ကိုဇော်မင်း တွင်သာ တကယ်တမ်း အပြစ်ရှိသည် ဖြစ်၍ ဘယ်လိုမှ မကျေနပ်နိုင်၍ စတိဖြစ်ဖြစ် ဟက်မည် ဆိုလျှင်လည်း ကိုဇော်မင်း မေးလ်ကိုသာ ဟက်တော်မူ ကြပါရန် လေးစားစွာ ပန်ကြားအပ်ပါသည် ခင်ဗျား။

သူရဿဝါနှင့် နာမည်ကြီးအဆိုတော်ဖြစ်နည်း

“သူရဿဝါနှင့် နာမည်ကြီးအဆိုတော်ဖြစ်နည်း”

သူရဿဝါ တစ်ယောက် ယခုတလော ရောဂါထ နေသည်။ ၉၆ ပါး ရောဂါထဲ များအနက် တစ်ခုမှ မဟုတ်။ အဆိုတော် ဖြစ်ချင်သော ရောဂါ ဖြစ်၏။ မီဒီယာ တစ်ခုက သီချင်းဆို ပြိုင်ပွဲ အစီအစဉ် တစ်ခု တင်ဆက်ရာ နာမည်ကျော် သွားခြင်းမှ အစပြုသည်။ ထိုပြိုင်ပွဲသို့ နိုင်ငံအဝှမ်းမှ ဂီတ ဝါသနာရှင် များစွာ လာရောက် ယှဉ်ပြိုင် ကြသည်။ ဂီတ အကြောင်း လုံးစေ့ပတ်စေ့ နားလည် သူများမှ စ၍ ရေချိုးခန်းထဲ အပျင်းပြေ သီချင်းညည်း ကြသူများ အဆုံး တရုန်းရုန်း စင်ပေါ်တက်၍ တီဗီဖန်သားပြင် မှတဆင့် အစွမ်းပြကြ၏။ နိုင်ငံကျော် ဂီတ ပညာရှင်များ၊ အဆိုတော်များက မိမိ၏ အဆိုစွမ်းအင် အပေါ် ဝေဖန် သုံးသပ် ဆုံးဖြတ်မှု ပြုသည်ကို ရရှိသဖြင့် သဘောလည်း ကျကုန်၏။ အသံ ကာလာ လှတာ၊ ဘယ်သံ၊ ညာသံ၊ အသက်ခိုးရှူပုံ၊ ပစ်ခ်ျယိုင်တာ၊ အိတ်စ်ပရက်ရှင် ကောင်းတာ၊ ညံ့တာ .. ဟူသော စကားတို့ကို လူအတော် များများ သိရှိနားလည် သုံးစွဲ လာကြ၏။ အဲဒီနောက်ပိုင်း အခြား အဆိုပြိုင်ပွဲ များလည်း အားကျမခံ ပေါ်ပေါက် လာသည်။ တစ်ပတ် ခုနစ်ရက်တွင် ခြောက်ရက်ခွဲ လောက်က အဆိုပြိုင်ပွဲ ထုတ်လွှင့်သော နေ့များ ဖြစ်ကုန်၏။ ရိုးရိုး တန်းတန်း အဆိုပြိုင်ပွဲ များအပြင် ဆန်းဆန်းပြားပြား အဆိုပြိုင်ပွဲ များလည်း ပေါ်ပေါက်လာ၏။

စင်ပေါ်မှ လူက သီချင်း ဆိုရသည်။ အောက်မှ ဒိုင်လူကြီး လေးငါး ခြောက်ယောက်က ၄င်းတို့၏ ရှေ့စားပွဲတွင် လူနာတင်ယာဉ်မှ မီးလုံးများ တပ်ဆင်၍ ယိုင်လျှင် သော်လည်းကောင်း၊ မလှလျှင် သော်လည်းကောင်း၊ ကီးအောက်လျှင် သော်လည်းကောင်း၊ အိတ်စ်ပရက် “ရှင်” ရမည့် နေရာတွင် မရှင်ဘဲ သေနေလျှင် သော်လည်းကောင်း .. တဂျောင်းဂျောင်း မြည်အောင် မီးလုံးများကို အပြိုင်အဆိုင် နှိပ်ကြ လေ၏။ စင်ပေါ် ဆိုနေသော သူမှာ မျက်လုံးလေး အပြူးသားဖြင့် ဒိုင်များ အခြေအနေကို ကြည့်ကာ ဆိုရ၏။ တစ်လုံး လင်းသော် ကိစ္စ မရှိသေး၊ နှစ်လုံး လင်းသော် အခြေအနေ သိပ်မကောင်း၊ သုံးလုံး လင်းသော် အဆိုလည်းရပ်၊ တီးလုံးလည်း ရပ်၍ အောင်ဖျာလိပ် ရ၏။ ဘာနှင့် တူပါသနည်း။ မီးပွိုင့်နား ကားတစ်စီး ရောက်လာ၍ စိမ်းနေလျှင် ဆက်သွား၊ ဝါနေလျှင် သတိထား၊ နီနေသော် ဘရိတ်ဆွဲ၍ ရပ် ဟူသော Process ကို အခြေခံသဖြင့် ဒိုင်များ စိတ်အေး လက်အေး မျက်လုံးကလေး မှိတ်၍ နားထောင် နေသော် မီးစိမ်းသည် ဖြစ်၍ ဆက်ဆို၊ တစ်ဦးနှင့် တစ်ဦး ခေါင်းချင်းဆိုင်ပြီး ဆိုနေသူကို လက်ညှိုးထိုး၍ ပွစိပွစိ ပြောဆို နေကြသော် မီးဝါသည် ဖြစ်၍ သတိ အနေအထား၊ ဘာမပြော ညာမပြော လက်ကို ရှေ့သို့ထုတ်ကာ မီးလုံးနှိပ်သည် ရှိသော မီးနီသည် ဖြစ်၍ ရပ်။ လူတကာက “မီးလင်းပြိုင်ပွဲ” ဟု အလွယ် ကင်ပွန်းတပ် သညာပြု ကြသော ထိုပြိုင်ပွဲကို သူရဿဝါက ကိုယ့်နည်း ကိုယ့်ဟန်ဖြင့် နာမည်ပေး ထားသည်။ “ရပ် ကြည့် သွား ပြိုင်ပွဲ” ဟူ၍။

ထိုပြိုင်ပွဲများ အကျိုး ကျေးဇူးကြောင့် ဝါသနာရှင်များ ဂီတအကြောင်း ကောင်းကောင်း နားလည် လာကြ၏။ လူရိပ် လူခြေ ကြည့်တတ် လာ၏။ ပါဖောမန့်များ ကောင်းကြ ကုန်၏။ လူကြီးများ သာမက စကား ပြောတတ်ခါစ ကလေး များလည်း အဆိုတော် ဖြစ်ကုန်ကြ၏။ ဒါတွေကို အမြဲတွေ့ နေရသော သူရဿဝါလည်း အထက်တွင် ပြောခဲ့သည့် အတိုင်း အဆိုတော် ဖြစ်ချင်သည့် ရောဂါပိုးများ တစ်နေ့တခြား တိုးပွားလာ၏။ အဆိုတော် ဖြစ်အောင် ကြိုးစားတော့မည်။ ဘယ်ကနေ စမလဲ .. စဉ်းစားကြည့်၏။ အရေးကြီး တာက နာမည် .. အနုပညာ နာမည်ပေါ့။ ကိုယ်ရွေးတဲ့ နာမည်က လူစိတ်ဝင်စားတဲ့ နာမည်မျိုး ဖြစ်မှ။ လက်ရှိ နာမည်ကြီး နေတဲ့ အဆိုတော် တွေရဲ့ နာမည်တွေကို လေ့လာကြည့်သည်။ Rဇာနည်၊ Lလွန်းဝါ၊ Lဆိုင်းဇီ၊ Nကိုင်ရာ၊ Aနွန်၊ Dဖြိုး … ဟိုက်ရှားဘား။ သူရဿဝါ သဘော ပေါက်သွားပြီ။ နာမည်ရှေ့တွင် အင်္ဂလိပ် စာလုံး တပ်သူများ နာမည်ကြီး အဆိုတော် ဖြစ်ကြသည်။ သူရဿဝါလည်း ဒီအတိုင်း နာမည်ပေးမည်။ အရင်ဆုံး မိမိ၏ နာမည်အရင်းမှ ရှေ့ဆုံး တစ်လုံးဖြစ်သည့် “ဘုန်း” ကို ယူလိုက်သည်။ ပြီးလျှင် အင်္ဂလိပ်စာလုံး တစ်လုံးကပ်မည်။ E-book, E-Library စတာတွေ တွင်ကျယ်သော Electronic ခေတ် .. ဆိုတော့ကာ ကိုယ့်နာမည်ကို အားကျမခံ “E ဘုန်း” လို့ပေးရင်ရော။ အသံထွက်၍ ရွတ်ကြည့်တော့ “အီးပုံး” ဖြစ်သွား၏။ ဟိုက် .. အမြန် ပြန်ပြောင်းမှ။ ဒါဖြင့် ကိုယ်ကြိုက်သည့် အဆိုတော် ကိုဂျီလတ်ကြီးနဲ့ ခပ်ဆင်ဆင် ဆိုရင်ရော … “G ဘုန်း”။ အသံထွက် ကြည့်တော့ “ဂျီပုန်း” ဖြစ်နေသည်။ ဘုန်းကညာ တစ်ပါး လုံးရာက ပြားမယ့် ကိစ္စ .. မဖြစ်ချေပြီ။ ဒီလောက်တောင် ရှိလှတာ … ဘယ်သူမှ မရွေးတဲ့ စာလုံး I နဲ့ ကပ်မယ်ကွာ .. ဆိုပြီး နာမည်ရွတ် ကြည့်တော့ အိုင်ဖုန်း (iPhone) ဖြစ်နေပြန်၏။ နောက်ဆုံး ဗေဒင်ဆရာဆီ သွားမှ “ဝေထူးသက်လွင်ရစ်ချတ်ဒင်” ဟူသော နာမည်ရ၍ ကိစ္စငြိမ်း၏။

သီချင်း ကောင်းဖို့ ကတော့ သိပ်ပြီး ပူစရာမလို။ အနှစ်နှစ် အလလ ကြိုးစားပမ်းစား စုထားသည်။ သူငယ်ချင်းများ ရေးသမျှ သီချင်းတွေကို အကုန်လိုက် ခိုးထားတာ။ Own Tune အမည်ခံ လိုက်မည် .. ဘယ်သူသိတာ မှတ်လို့။ ပြီးတော့ နာမည်ကြီး တေးရေးဆရာဆီ တစ်ပုဒ် နှစ်ပုဒ် အပ်လိုက်မည်။ ဒါဆို သီချင်းတွေ စိတ်တိုင်းကျ ဖြစ်ပြီ။ အရေးအကြီးဆုံး တစ်ချက် ကျန်သေးသည်။ သီချင်း တစ်ပုဒ်လောက် ပေါက်သွားဖို့ အရေးကြီးသည်။ ဒါမှ နာမည်ကြီး အဆိုတော် ဖြစ်မည်။ လူတွေ ပါးစပ်ဖျားမှာ တဖွဖွ ဖြစ်လျှင် ပေါက်ပြီ။ ဘယ်လို လုပ်ရမလဲ … အကြံထုတ် ကြည့်သည်။ အခွေကို တီဗီမှာ ကြေငြာ လျှင်ရော ..။ မကောင်း … ပိုက်ဆံ အတော်ကုန်မည်။ အခွေထုတ်ဖို့ ပိုက်ဆံတောင် မနည်းရှာရမှာ။ အကုန်အကျ များလွန်းသည်။ အကုန်အကျ နည်းပြီးတော့ ထိရောက်မည့် နည်းလမ်းကို စဉ်းစားရမည်။ တစ်ရက် .. နှစ်ရက် .. သုံးရက် မြောက်တော့ အလွန်ကောင်းသော နည်းလမ်း နှစ်သွယ်ကို စဉ်းစား၍ ရသွားပြီ။ နှစ်နည်း စလုံးသည် “ပေါက်” သီချင်း အဖြစ် အသွင်ပြောင်းဖို့ အကောင်းဆုံး ဖြစ်နေသည်ကို အံ့သြဖွယ်ရာ တွေ့ရှိရသည်။ ထိုသို့ဖြင့် သူရဿဝါ အခွေတစ်ခွေ ထုတ်လိုက်သည်။

အခွေထွက်ပြီး ရက်သိပ် မကြာခင် အင်တာနက်ဆိုင် တစ်ဆိုင်သို့ သွားသည်။ G-mail ကို ဖွင့်သည်။ အခွေထဲမှ သီချင်းတွေ အကုန်လုံးကို Mail တွင် Attach တွဲသည်။ ထို့နောက် Account ထဲမှ ရှိသမျှလူ အကုန်လုံးဆီ Forward Mail အနေဖြင့် သီချင်းတွေ ပို့လိုက်သည်။ ကိုယ့်သီချင်းကို နားမထောင် ကြမှာ စိုးသဖြင့် ပစ်စာလိုလို ထည့်ရေး လိုက်သေး၏။ “ယခု Forward Mail တွင် ပါဝင်သော သီချင်းများ အားလုံးကို ထူးဆန်းသော အိပ်မက်အရ ပို့လိုက်သည်။ နားထောင် ဖြစ်အောင် နားထောင်ပါ။ နားထောင်လျှင် ကံစမ်းမဲ ဖောက်ပေးမည်။ နားမထောင်ပါက ဘုရားစူးမည်၊ မိုးကြိုးပစ်မည်၊ မြွေကိုက်မည်၊ ကျားကိုက်မည်၊ ကာလနာ တိုက်မည်။ ရွှေပြည်သာမှ ပဲပြုတ်သည် မဘုမ နားမထောင် မိသဖြင့် ပဲပြုတ်တောင်း ခေါင်းပေါ်မှ လွတ်ကျသည်။ နောက်မှ အသိတရား ရပြီး ပြန်နားထောင် မိသဖြင့် နှစ်လုံးထီ ငါးဆယ်ဖိုး ပေါက်သည်” စသည်ဖြင့်ပေါ့။ အဲဒီလို လုပ်ပြီး သိပ်မကြာခင် သီချင်းတစ်ပုဒ်က လူကြိုက်များ သွားသည်။ Forward လုပ်ခြင်းရဲ့ အကျိုးကျေးဇူး တွေပေါ့။ ကဲ .. နောက်တစ်နည်း လုပ်လိုက်ရင် ပွဲသိမ်းပြီ။ ချက်ချင်း အကောင်အထည် ဖော်ရမည်။ ဝမ်းရေးအရ လမ်းပေါ်တွင် သီချင်းဆို၍ တောင်းစားသော ကလေးတွေဆီ သွားသည်။ အွန်လိုင်းတွင် ပေါက်သော သီချင်း တစ်ပုဒ်ကို နှုတ်တိုက် သင်ပေး လိုက်သည်။ အလုပ်လုပ်လျှင် ဒီသီချင်းလေး ဆိုကြပါကုန် … ဟူ၍။ သူရဿဝါ စောင့်ကြည့်သည်။ သူတို့ ဝါးဆစ်ပိတ် ကလေး တဒေါင်ဒေါင် တီး၍ သီချင်း ဆိုကြသည်။ သူရဿဝါ ဝမ်းမြောက်ဝမ်းသာ အိမ်ပြန်၏။

သိပ်မကြာပါ။ ထိုသီချင်းကို နေရာအနှံ့တွင် ကြားလာရသည်။ လက်ဖက်ရည်ဆိုင်တွင် ဖွင့်ကြသည်၊ အင်တာနက် သုံးသူများ ထိုသီချင်းကို Mail ထဲမှ ဖွင့်၍ နားထောင်ကြသည်။ လမ်းပေါ်တွင် တဒေါင်ဒေါင် တဒင်ဒင် ဝါးဆစ်ပိတ် သံလေးများဖြင့် ကြားရသည်။ “နဖူးပေါ် လက်တင် .. စဉ်းစားလိုက်ရင် .. ငါလေ ရင်မောတယ်” သီချင်းကို ဝါးဆစ်ပိတ် တီး၍ မဆိုကြတော့။ မြန်မာ နိုင်ငံတွင် အွန်လိုင်းမှ ပေါက်သော သီချင်းများနှင့် နေရာတကာ တောင်းရမ်း စားသောက် သူများ တွင်တွင်ကျယ်ကျယ် ဆိုလျှင် ထိုသီချင်း နာမည်ကြီးလေ့ ရှိသည့် ထုံးစံ အတိုင်း ထိုနည်းလမ်း နှစ်မျိုးစလုံးကို အသုံးပြုခဲ့သည့် သူရဿဝါမှာ “ပေါက်” သီချင်း တစ်ပုဒ်နှင့် အတူ ဂီတလောကတွင် နေ့ချင်းညချင်း တန်းဝင် အဆိုတော် ဖြစ်ကာ နာမည်ကြီးသွား လေတော့သည်။

“သူရဿဝါနှင့် အိုင်တီသမား ဈေးရောင်းစားတော့ ….”

ဆယ်နှစ်ကျော်ကြာ ကျင်းပခွင့် မပြုခဲ့သော ပုဇွန်တောင် ရေကျော် သီတင်းကျွတ် ပွဲဈေးတန်းကို ပြန်လည် ကျင်းပခွင့် ပြုလိုက်သည်။ ဒီနှစ် သီတင်းကျွတ်မှာ အိုင်တီသမားများ ဈေးရောင်း စားကြမည်။ M51A ခေါင်းဆောင်ကြီး ကိုတင်ထွန်းလွင်၊ စုဘူးဖန်ကလပ် ဥက္ကဌ ကိုစိုင်းနောင်နှင့် စာရေးဆရာကလေး ကိုသူရဿဝါတို့ ဆိုင်ခန်းနေရာ ယူ၍ ရေကျော် သီတင်းကျွတ် ပွဲတော်တွင် ဈေးရောင်းရန် ကြံစည် ကြသည်။ ဘာရောင်းကြမလဲ .. တိုင်ပင်ကြသည်။ ဘီယာ ရောင်းကြမည်။ ဟုတ်ပြီ … စပ်တူ ရှယ်ယာထည့် လိုက်ကြသည်။ တစ်ယောက် သုံးသိန်း အရင်းဆိုတော့ သုံးယောက်ဆို ကိုးသိန်းပေါ့။ စိုးရိမ်တတ်သော သူရဿဝါက မေးမိသည်။ “ကိုထွန်း … ပွဲဈေး လေးရက်ထဲနဲ့ ကိုးသိန်းဖိုး ကျော်အောင် ပြန်ရောင်းရ ပါ့မလား” … ဆိုတော့ ကိုတင်ထွန်းလွင်က ရယ်သည်။ ပြီးတော့မှ … “ဒီမယ် .. ဝါဝါ .. မှတ်ထား … ပထမရက် သိပ်ရောင်းရမှာ မဟုတ်ဘူး … နည်းနည်း စိတ်ညစ်ရမယ်၊ စိတ်မပူနဲ့ .. ဒုတိယရက် .. နည်းနည်းပျော်ရမယ်၊ တတိယရက် … ဒီထက် ပိုပျော်လာရမယ် .. နောက်ဆုံးရက် … ပျော်လွန်းလို့ ထပါကရမယ် .. ဟဲဟဲ” တဲ့။ သူရဿဝါ ထိုစကားလေးကို အလွန် သဘောကျ သွားသည်။

သူရဿဝါက ဈေးရောင်းမည့် ပွဲရက် လေးရက်မှာ နှစ်ရက်က နယ်မှာ အငြိမ့် သွားကရမယ် ဆိုတော့ တစ်ရက် တစ်သောင်းနှုန်းဖြင့် နှစ်ရက်စာ နှစ်သောင်း အဖြတ်ခံ ရမည်တဲ့။ သြော် … ရောင်းတောင် မရောင်းရသေး .. ရှုံးနှင့်နေသော ဘဝ။ သုံးယောက်ပေါင်း လိုက်တော့ ကံဇာတာက အမြင့်ကြီး ဖြစ်သွားသည်။ ဒီနေ့ သုံးသိန်းစီ စုလိုက်ပြီး နောက်နေ့ ရောက်တော့ ဘီယာ ရောင်းခွင့် ပါမစ်က လုံးဝမရတော့၊ အပိတ်ခံလိုက်ရသည်။ ဘီယာရောင်းဖို့ ပြင်ဆင် ထားရသည့် စရိတ်စကတွေ သဲထဲရေသွန်။ အကုန်လုံး ထူပူ ကုန်ကြသည်။ အင်းလေ … မထူးတော့ဘူး။ ဘီယာ မဟုတ်လည်း မရ ရတာတော့ ရောင်းရတော့မှာပဲ။ နောက်ဆုံး … ယိုးဒယားကင်၊ ဝက်သားတုတ်ထိုး စသည်ဖြင့် ရောင်းကြဖို့ သဘောတူ လိုက်ကြသည်။ သဘောတူပြီး နောက်တစ်နေ့ ဆိုင်ခန်းလေး ဆောက်ဖို့ ကိုထွန်းအိမ် ရောက်သွားသည်။ ဘယ်လောက်ထိ ကံဆိုးလည်း မမေးပါနှင့် … ဆိုင်ဆောက်ရန် ဝါးလုံးပင် ရှာဝယ်လို့ မရတော့။ ဒါဆိုလည်း ရတာကို အရင် လုပ်ကြမည်။ ညနေ ကိုစိုင်းနောင် ရောက်လာတော့ ဝက်သားပြုတ်ဖို့၊ ဓါးကိုင်ဖို့ အတွက် လုပ်ပေးနိုင်မည့် သူကို စမ်းချောင်း အနှံ့ လိုက်ရှာကြသည်။ ကံက ဘယ်လောက်ထိ ကောင်းနေလဲ ဆိုတော့ ခါတိုင်း ဘယ်အချိန်သွားသွား တွေ့နေကျ ဆိုင်က ကိုယ်လည်း လိုက်ရှာရော အစအနတောင် ရှာမရတော့ .. နေရာပြောင်း သွားသည်။ ဒီလိုနဲ့ နောက်နေ့ ခရီးသာ ထွက်လာခဲ့ရသည်။ စိတ်က မဖြောင့်။ ဆိုင်ဖွင့်ဖို့ ဘာမှအဆင်မပြေသေး။

စကားစပ်၍ ပြောရဦးမည်။ ကံများ ဆိုးမယ့်ဆိုးတော့ ကောင်းကွက် ရှာမရအောင်ကို ဆက်တိုက် ဆိုးသည်။ အသေးအဖွဲ လေးတွေရော .. အကြီးကြီး တွေရော။ စပြီး အဆင်မပြေ တာကတော့ ခုနက ပြောခဲ့သည့် အတိုင်း .. ရန်ကုန် ရေကျော် ပွဲဈေးမှာ ဈေးရောင်းမည့် ကိစ္စကနေ စတာဖြစ်၏။ အဲဒါက ရန်ကုန်မှာ မနေခဲ့ … နယ်ကို သွားသည်အထိ ကပ်ပါလာသည်။ နယ်ရောက်တော့ နေ့လည် နေ့ခင်း မန်ကျည်းပင် အရိပ်အေးအေးအောက် အိပ်နေတုန်း ဆိတ်က မျက်နှာပေါ်တက်၍ လျှာနှင့်လျက်သည်။ နယ်ကနေ ရန်ကုန် ပြန်လာတော့ သူရဿဝါတို့ ငှားလာသည့် ကားက မှောက်မလို ဖြစ်တာ သေဖို့ .. သီသီလေး။ နယ်ကနေ ရန်ကုန်ကို လှမ်းပြီး ဈေးရောင်းသည့် အခြေအနေ လှမ်း၍ ဖုန်းဆက် မေးတော့ အားရစရာ။ ပထမရက်က ဆိုင်ထွက်ဖို့ အခက်အခဲတွေ ရှိ၍ နှစ်သောင်းဖိုး ရောင်းရသတဲ့ .. ဒုတိယ ရက်ကျတော့ ရောင်းကောင်းမည် ကြံတော့မှ ညကိုးနာရီလောက် မိုးရွာလာ၍ ဆိုင်သိမ်းရသတဲ့။ အောက်ပြည် အောက်ရွာမှာ ပိုက်ဆံရှာရ အတော်ခက်မှန်း အခုမှ သိသည်။ ဒီကြားထဲ ပုဇွန်တောင် ဂီတအစည်းအရုံးက ရေကျော်ပွဲမှာ အငြိမ့်ကပေးဖို့ သူရဿဝါတို့ အဖွဲ့ကို ငှားထား ပြီးမှ ပွဲပါမစ် မကျဟုဆိုကာ ကရမည့်နေ့ကျမှ ပွဲဖျက်သည်။ စရံငွေလည်း ကြိုမယူ ထားမိတော့ ပွဲကဖို့ နယ်ကနေ အသည်းအသန် ပြန်လာ ရတာ အကုန်မော သွားကြ၏။ ကံက ဆိုးပြီဆို အဲသည်လို ဆက်တိုက် ဆိုးတာ။

ပွဲမက ရတော့ဘူး ဆိုတော့ အေးအေးဆေးဆေး ဈေးရောင်းလို့ ရပြီ။ သူရဿဝါရယ်၊ ကိုစိုင်းနောင်ရယ်၊ ကိုထွန်းရယ် .. ရှယ်ယာရှင် သုံးယောက် ဆုံ၍ ပွဲဈေးတတိယ ရက်မှာ စ၍ ရောင်းကြသည်။ တကယ် လုပ်ကြည့်တော့မှ ဈေးရောင်းရတာ မလွယ်မှန်း သိရသည်။ Mouse ကလေး ကိုင်ပြီးတော့ စားပွဲပေါ် ပွတ်နေရတာနှင့် ပန်းကန်ဆေးရတာ မတူကြောင်း၊ ကွန်ပျူတာ System ပုံးတွင် Memory Stick ထိုး၍ မတော်တဆ ဓါတ်လိုက်ခြင်းသည် ယိုးဒယားအကင် ကြော်သည့်အချိန် ဆီပေါက်တာလောက် မခံစားရကြောင်း လက်တွေ့ သိလာသည်။ အခါတိုင်း မျက်နှာ ရှစ်ခေါက်ချိုးနှင့် သူရဿဝါမှာ ယခုတော့ မျက်နှာပေါ် ပျားရည်များ မှောက်ကျသလို အချိန်ပြည့် ပြုံးထားရသည်။ စားပွဲသုတ် ပုဆိုးလေး ခါးကြားထိုး၍ စားပွဲဝိုင်း တကာသို့ သွားကာ “ဘာစားမလဲကို၊ ဘာစားမလဲ မ” စသည်ဖြင့် ခါးချိုး၍ မေးနေရသည့် ဆောင်းပါးရှင်လေး သူရဿဝါအား စာဖတ်ပရိသတ်များ မြင်စေချင် စမ်းပါဘိ။ တတိယရက် ကတော့ ဈေးရောင်း၍ ကောင်းသည်။ အခြေအနေ သိပ်မဆိုးဟု ပြော၍ရသည်။ လပြည့်နေ့ကိုး။ ဒါတောင် ညဖက် ဆိုင်သိမ်း၍ စာရင်းပိတ်တော့ တစ်ယောက်ကို တစ်သိန်းလောက် ရှုံးနေပြီ။ နောက်ဆုံးနေ့ကို အသေအလဲ ရောင်းကောင်းတယ် ဆိုရင်တောင် တစ်ယောက် ငါးသောင်း ခြောက်သောင်းတော့ အသာလေး ရှုံးမည်။ မနက်ဖြန် နောက်ဆုံးနေ့ သေချာ ရောင်းရမည်။

နောက်ဆုံးနေ့ ရောက်တော့ ရောင်းကောင်းပုံများ နေ့လည် သုံးနာရီမှ စရောင်းတာ ညခြောက်နာရီ ကျော်သည် အထိ တစ်သောင်း မကျော်သေး။ တစ်ယောက်ချင်း အခြေအနေ အကဲခတ်ကြည့်တော့ မြင်ရတာ မကောင်း။ ကိုစိုင်းနောင် ကြက်ကြီး လည်လိမ် ထားသလို စိတ်ဓါတ်ကျ၍ ထိုင်နေသည်။ M51A ခေါင်းဆောင်ကြီး ကိုတင်ထွန်းလွင် ကျတော့ “ရင်ထဲမှာ ပန်းတွေ ပွင့်နေတာ မဟုတ်ဘူးနော် .. ဒူးရင်းသီးတွေ သီးနေတာ” ဟု ဒေါသတကြီး ထိုင်အော် နေသည်။ သူရဿဝါ …. ဘုရားစာပါ ရွတ်၍ ဈေးရောင်း နေရသည်။ ညရှစ်နာရီ ကိုးနာရီကျော်တော့ ဈေးဝယ်သူများ မရှိတော့၍ သုံးယောက်သား စိတ်ညစ်ညစ်နှင့် စကားထိုင်ပြော နေကြရသည်။ ကိုထွန်းလည်း သူရဿဝါကို သနား၍ ပထမနှစ်ရက်စာ နှစ်သောင်းကို မဖြတ်မတောက်တော့။ အလွဲများပြော၍ ညစ်ထပ်ထပ်နှင့် ရယ်ကြရသည်။ ဒီနှစ် ပုဇွန်တောင် ရေကျော် သီတင်းကျွတ် ပွဲကတော့ အမှတ်တရ ဖြစ်ခဲ့ပြီ။ ညဖက် ဆိုင်သိမ်းခါနီး သူရဿဝါ ပြန်မည် လုပ်တော့ ကိုထွန်းက မေး၏။ သူက လုံးဝမလျှော့သေး ..။ “ငါကတော့ အထာသိသွားပြီ .. နောက်နှစ် ထပ်ရောင်းဦးမှာ .. ဝါဝါရော ရှယ်ယာ ပါဦး မှာလား” တဲ့။ တစ်မိနစ်တောင် မစဉ်းစားဘဲ သူရဿဝါ ပြန်ဖြေခဲ့၏။ “ပါမှာပေါ့ ကိုထွန်းရယ် … တစ်နှစ်မှ တစ်ခါ ဒီလို ကြီးကြီးကျယ်ကျယ် အလှူလုပ်ရတာပဲ .. လုပ်ဖြစ်အောင် လုပ်ဦးမှာ … အဟီး …” ဟူ၍။ တကယ့်ကို စားသောက်ကုန် ပါပဲ။ သူများတွေ စားဖို့ သောက်ကြဖို့ သူရဿဝါတို့ သုံးယောက် ရှိသမျှ ကုန်သွားကြတာကိုး။

ပုဇွန်တောင် ပွဲဈေးတုန်းက မောင်အေးကဖီးနှင့် မျက်နှာချင်းဆိုင်ရှိ ရွှေမြို့တော် ချစ်တီး စားတော်ဆက် ရှေ့တွင် သုံးခန်းတွဲ ယူ၍ ယိုးဒယားကင်၊ ကြာဇံကြော်၊ ဝက်သားတုတ်ထိုး ရောင်းနေကြသည့် သူများ၏ ဆိုင်တွင် ချစ်စွာသော စာဖတ် ပရိသတ် လာ၍ စားသောက် ခဲ့မိကြသည် ဆိုလျှင် သူရဿဝါတို့ သုံးယောက်ပင် ဖြစ်သည်ဟု နှလုံးသွင်း၍ ကျွန်ုပ်တို့ ပြုခဲ့ သမျှသော စားသောက်ကုန် ဒါနကောင်းမှု အစုစုအတွက် သာဓု သာဓု သုံးကြိမ် ခေါ်ကြပါကုန်။ သူရဿဝါ စိတ်နာနာနှင့် တွေးမိသည်။ အိုင်တီသမား ဈေးရောင်းစားတော့ .. အိုင်တီသမား ဈေးရောင်းစားတော့ ဘာဖြစ်သလဲ။ အော် … အလှူဒါန ပြုကြသူငါ ဖြစ်ခဲ့ပါသည် ခင်ဗျား။

ဆြာသူရဿဝါ၏ အိုင်တီတဲရော့ အချစ်ဗေဒင်ဟောစာတမ်းကြီး

“ဆြာသူရဿဝါ၏ အိုင်တီတဲရော့ အချစ်ဗေဒင်ဟောစာတမ်းကြီး”

ကျွန်ုပ် ဗေဒကဝိ ပညာရှိ ဆြာသူရဿဝါ သည်ကား အမျိုးမျိုး အစုံစုံ အဖုံဖုံသော ဗေဒင်တွက်နည်း များဖြင့် တွက်ချက် သမှု ပြုရခြင်း အလုပ်တွင် ငြီးငွေ့လာသည် ဖြစ်သည်နှင့် အညီ နိုင်ငံရပ်ခြား သိုးဆောင်းသားတို့ ဗေဒင် ကဝိ တွက်ချက် ဘိသည့် ဖဲချပ်အလား တဲရော့ကဒ်များကို ကိုယ့်နည်းကိုယ့်ဟန်ဖြင့် တီထွင်ဖန်တီး အသုံးပြုရန် အလို့ငှာ စိတ်အကြံ ရလေသည်။ အထူးသဖြင့် Net Guide ဂျာနယ်၏ စာဖတ် ပရိသတ်များ ဖတ်ရှု လေ့လာ ကြမည် ဖြစ်သဖြင့် ခေတ်မှီ ဆန်းပြားစွာသော အိုင်တီ တဲရော့ကဒ်များ အနေဖြင့် အထူးတလည် ဟောကြား လိုက်ရပေသည်။ ချစ်စွာသော စာဖတ်သူတို့ အနေနှင့် Your Freedom, Hacker, Touch Screen, CD-DVD Rom, Virus, UPS, Connection ဟူသော ကဒ်ကြီး ၇ ချပ်ကို ယူငင်ကိုင်ဆကာ မျက်လုံးမှိတ် နံကြားထောက်ပြီး အံကြိတ်၍ အိုင်တီ တဲရော့ကဒ် တစ်ကဒ်ကို ရွေးချယ် ပါလေ။

သင်ရွေးချယ်မိသော ကဒ်မှာ Your Freedom ဖြစ်သည် ရှိအံ့။ ၄င်း Your Freedom သည် ပိတ်ထားသော .. ဖွင့်မရသော Website များကို ဖွင့်ရန် အလို့ငှာ ကျော်သည့် ခွသည့် အဓိပ္ပါယ်ကို ဆောင်လေသဖြင့် သင့်အား သူငယ် နှပ်စား သဖွယ် သဘောထားကာ အမျိုးစုံ ကြိုးခုန်မည့် ချစ်သူရည်းစားမျိုးနှင့် ဆုံရမည် ဟူသော ဟောကိန့်း ထွက်လေ၏။ သင့်အား ဘက်ဖက်က လှိမ့်လိုက်၊ ညာဖက်က ပတ်လိုက်နှင့် အလွန့်အလွန် ဥာဏ်နီ ဥာဏ်နက် များမည် ဖြစ်လေရာ သင့်အနေနှင့် သတိကြီးကြီး ထား၍ ဆက်ဆံရမည် ဖြစ်သော ဟူ၏။

သင်ရွေးချယ်မိသော ကဒ်မှာ Hacker ဖြစ်သည် ရှိအံ့။ ၄င်းသည် သင်တို့ သိထားပြီး ဖြစ်သည့်အတိုင်း ခိုးယူ ဖောက်ထွင်းခြင်း သဘောကို ဆောင်လေ သဖြင့် သင်သည် ကောင်းကောင်းကြီး အနှပ်ခံရပေအံ့။ သင်၏ ချစ်သူ ဖြစ်လာ လတ္တံ့သော ကြင်ဖော်သည် သင့်အား ညာတာပါတေး မလိမ့်တပတ်ဖြင့် သင်၏ ရှိရှိသမျှ အိတ်ကတ်များ အတွင်းမှ အဖိုးတန် ပစ္စည်းများအား Hacking လုပ်ချေမည် ဖြစ်လေရာ သင့်အနေနှင့် လက်ထိပ်တစ်ကွင်း အဆင်သင့် ဆောင်ထား၍ ၄င်းအား ဆက်ဆံပေါင်းသင်း ရမည်ဖြစ်သည်ဟု အဟောထွက်၏။

သင်ရွေးချယ်မိသော ကဒ်မှာ Touch Screen ဖြစ်သည် ရှိအံ့။ Touch Screen တို့၏ သဘော သဘာဝမှာ နှိပ်စရာ ခလုပ် မပါရှိဘဲ လက်မ သို့မဟုတ် လက်ညှိုးတို့ဖြင့် ပွတ်မှသာ အလုပ် လုပ်သည် ဖြစ်သဖြင့် သင်ကြုံတွေ့ရမည့် ချစ်သူ ရည်းစားမှာ နှိပ်စရာ ခလုပ် မပါရှိဘဲ လက်မ လက်ညှိုးတို့ဖြင့် ပွတ်မှသာ အလုပ် လုပ်သည် ဖြစ်သဖြင့် … (အလို .. ဘယ်လိုကြီး ပါလိမ့် … ပြန်ပြင် ဟောမှပဲ) သင်ကြုံတွေ့ရမည့် ချစ်သူ ရည်းစားမှာ သင့်အနားတွင် ပွတ်သီးပွတ်သတ်ဖြင့် ကြောင်လေး တစ်ကောင်ကဲ့သို့ ချွဲနွဲ့နေထိုင် ရသည်ကို နှစ်သက်သူ ဖြစ်ပေ၏။ သင်၏ ကြင်နာ ယုယမှုကို သဘောကျ၍ သင့်အား အလွန်တရာ ချစ်ခင်သူ ဖြစ်မည် ဆိုသော်လည်း သင်သည် အလွန်တရာ အလုပ်ရှုပ်မည့် အရေးပင် ဖြစ်သည်ဟု ကြိုတင်၍ သတိပေး ရပေသည်။

သင်ရွေးချယ်မိသော ကဒ်မှာ CD-DVD Rom ဖြစ်သည် ရှိအံ့။ ၄င်းသည် အခွေမရှိလျှင် ငြိမ်ငြိမ်လေး နေ၍ CD/ VCD အခွေ တစ်ခွေခွေ ထည့်မည်ဟု ကြံစည်၍ ခေါ်သော အခါမှ ထွက်လာသည် ဖြစ်ပြီး အခွေထည့်ပေး ပြီးသော အခါတွင်လည်း ခပ်တည်တည် ပြန်ဝင် သွားတတ်သည့် သဘောရှိလေရာ သင်ကြုံတွေ့ရမည့် လက်တွဲဖော်သည် သင့်ဘဝထဲတွင် ငြိမ်ငြိမ် မနေဘဲ သင့်ဆီ ပြန်လာလိုက် ထွက်သွားလိုက်ဖြင့် ဂဏာမငြိမ်သည့် သူမျိုး ဖြစ်မည်ဟု ဆိုနိုင်ပြီး သေချာသော အဟော တစ်ခုမှာ CD ခွေတည်းဟူသော ဥစ္စာပစ္စည်း မရှိသည့်အခါတွင် သင့်အနား မလာဘဲ သူ့နေရာသူ ငြိမ်ကုတ် နေမည်ဖြစ်ပြီး CD ခွေတည်းဟူသော ပစ္စည်းဥစ္စာကို မြင်သောအခါ သင့်အနားသို့ ရောက်လာ၍ CD Rom ထဲသို့ CD ပြားထည့်ခြင်း တည်းဟူသော သဘောအတိုင်း သင့်ထံမှ ပစ္စည်းဥစ္စာကို ရပြီးသော အခါတွင် သင့်အနားမှ ပြန်လည် ထွက်ခွာ သွားမည့်သူ ဖြစ်ပေမည် ဟူသော ဟောကိန်း ထွက်လေ၏။

သင်ရွေးချယ်မိသော ကဒ်မှာ Virus ဖြစ်သည် ရှိအံ့။ သင်သည် သတိကြီးကြီး ထားရတော့မည် ဖြစ်လေ၏။ အဘယ်ကြောင့် ဆိုသော် သင်၏ ဘဝသည် ကွန်ပျူတာ တစ်လုံးဖြစ်ပါက သင်၏ ချစ်သူ ရည်းစားသည် ကွန်ပျူတာထဲ Virus ရောက်သကဲ့သို့ သင့်ဘဝထဲသို့ ဘယ်ကနေ ဘယ်လိုမှန်းမသိ ဝင်ရောက်လာပြီး သင့်အား နာဂစ်သဖွယ် မွှေမည့် သူမျိုး ဖြစ်ပေသည်ဟု ဟောကိန်း ထွက်လေ၏။ ဗိုင်းရပ် ဆိုသော အမည်နှင့် လျှော်ညီစွာပင် သင့်ဘဝအား ဗိုင်းခနဲ ရပ်သွားအောင် စွမ်းဆောင်နိုင်သည့် အာဂ ချစ်သူရည်းစားမျိုး ဖြစ်၍ ဗိုင်းရပ်စ် ဝင်လျှင် ကွန်ပျူတာ တစ်လုံးလုံး လေးလံ နေသကဲ့သို့ သင်သည် ၄င်းနှင့် တွေ့ဆုံပြီး Virus အကိုက်ခံရ သကဲ့သို့ဖြစ်၍ သင့်ဘဝအား လေးလံထိုင်းမှိုင်းအောင် လုပ်မည့် သူမျိုး ဖြစ်ချေ၏။

သင်ရွေးချယ်မိသော ကဒ်မှာ UPS ဖြစ်သည် ရှိအံ့။ UPS ၏ သဘောအရ မီးအားပြည့် နေချိန်တွင် ကွန်ပျူတာ အား ထိန်းသိမ်း ကွပ်ကဲ၍ မထိခိုက်အောင် ကာကွယ် ပေးထားမည် ဖြစ်သော်လည်း မီးအား အပြည့်အစုံ မရရှိသည့် အခါတွင် တတွီတွီ တတွံတွံ အော်မြည်၍ နားမခံသာအောင် ရှိလိမ့်မည် ဖြစ်လေသည်။ ထို့ကြောင့် သင်၏ ချစ်သူ ရည်းစားသည် စိတ်ကြည်လင် နေသည့် အချိန်တွင် သင့်အား ကလေး တစ်ယောက် သဖွယ် ကာကွယ် စောင့်ရှောက်မည် ဖြစ်သော်လည်း ၄င်းစိတ်အလို မကျသည့် အချိန်နှင့် တိုးပါက သင့်အား တဖျစ်တောက်တောက် ပြောဆို မြည်တွန်၍ အလွန်တရာ နားဒုက္ခ ပေးမည့်သူ ဖြစ်မည်ဟု အဟောထွက် လေ၏။ ထို့ကြောင့် သင်သည် နားထဲ ဆို့ထားရန် ဂွမ်းအထုပ်လိုက် ဝယ်ယူ ထားတတ်မှသာ အဆင်ပြေမည် ဟူ၏။

သင်ရွေးချယ်မိသော ကဒ်မှာ Connection ဖြစ်သည် ရှိအံ့။ ၄င်းသည်ကား ကျွန်ုပ်၏ တဲရော့ ကဒ်များထဲတွင် အစွမ်း အထက်ဆုံးနှင့် ကြောက်စရာ အကောင်းဆုံး ဖြစ်ချေ၍ သင်သည် ဤကဒ်ကို ရွေးချယ် မိသည်မှာ ငါးပါးမှောက် သည်နှင့်မခြား ရှိမည် ဖြစ်ကာ ကျွန်ုပ် စီရင်အပ်သော တဲရော့ကဒ် များအနက် အထူးကဒ် ဖြစ်သည်နှင့် လျော်ညီစွာ အထူး ဟောစာတမ်းကို ဟောကြား ပေအံ့။ Connection ဆိုသည်မှာ ကျလိုက် တက်လိုက် သဘော ရှိသည်ဖြစ်၍ သင်ကြုံဆုံ ရမည့် ချစ်သူ ရည်းစားသည် အခုတစ်မျိုး တော်ကြာတစ်မျိုး နှစ်မျိုး ရှိသည် ဖြစ်လေ၏။ ထို့အပြင် Connection တို့၏ သဘောအရ ကောင်းနေချိန်တွင် မတည်ငြိမ် တတ်သော်လည်း ကျပြီဆိုလျှင် တည်ငြိမ် လေးနက်စွာ ပြန်မတက်စတမ်း ကျသည်ဖြစ်၍ သင်၏ ချစ်သူ ရည်းစားသည် ကောင်းသော ကိစ္စများ ဆုံးဖြတ်ရာတွင် စိတ်ကယောင်ခြောက်ခြား ဖြစ်တတ် သော်လည်း မကောင်းသည့် ကိစ္စ တစ်ခုခုကို ဆုံးဖြတ်ပြီးလျှင်မူ နောက်လှည့် မကြည့်စတမ်း ပြတ်သားသူတစ်ဦး ဖြစ်ချေသည် ဟူ၍ ဟောကိန်း ထွက်လေ၏။ ထိုသို့သော သူမျိုးနှင့် ကြုံဆုံရသည် ဖြစ်၍ သင်သည် မမြဲခြင်းတရားကို လက်ကိုင် ထားတတ်သော စိတ်ဓါတ် တည်ငြိမ်သူ တစ်ဦးဖြစ်မှသာ အဆင်ပြေမည် ဖြစ်ပြီး စိတ်ခိုင်သူတစ်ဦး မဟုတ်ပါက သွက်သွက်ခါအောင် ရူးသွပ် လောက်အောင် ခံစားရမည် ဖြစ်သဖြင့် ကိုယ့်ကိုယ်ကို စိတ်မချပါက မရရအောင် ရုန်းထွက် သင့်သည်ဟု အကြံပြုလိုက်ရလေ၏။

ဤတွင် ကျွန်ုပ် ဗေဒကဝိ ပညာရှိ သူရဿဝါ၏ အိုင်တီတဲရော့ အချစ်ဗေဒင် ဟောစာတမ်းကြီး ပြီးလေ၏။ နောင် အခါသင့်၍ အခွင့်သာ ဦးမည် ဆိုပါက နောက်ထပ် ဥာဏ်နီဥာဏ်နက် ထွက်သမျှသော ကိစ္စရပ်များ အားလုံးကို ဗေဒင် တဲရော့ကဒ် အသွင် ဖန်တီး၍ ဟောစာတမ်းများ ထပ်မံထုတ်ဖော် ရေးသားဦးမည် ဖြစ်သဖြင့် “မကြာမီ .. လာမည် … မျှော်” ကြပါရန် ချစ်သော ပရိသတ်များအား လေးစားစွာ ပန်ကြားလိုက်ရပေသတည်း။

သူရဿဝါနှင့် တိုးရစ်စစ်တမ်း

“သူရဿဝါနှင့် တိုးရစ်စစ်တမ်း”


သူရဿဝါ အခုတလော အငြိမ်မနေနိုင်။ လေ့လာ စူးစမ်းချင်စရာ ကောင်းသော ကိစ္စ တစ်ခုကြောင့် ဖြစ်၏။ ထိုကိစ္စမှာ အခြားမဟုတ်။ တလောလေးက သိလိုက် ကြားလိုက် ရခြင်း ဖြစ်သည်။ ဘာလဲဆိုတော့ ယခုနှစ်ပိုင်း အတွင်း စစ်တမ်း ကောက်ယူမှု တစ်ခုအရ သူရဿဝါတို့ မြန်မာ နိုင်ငံသည် နိုင်ငံခြား ခရီးသွားများ လာရောက် လည်ပတ် ချင်သည့် ထိပ်တန်း နိုင်ငံ များထဲတွင် တစ်ခု အပါအဝင် ဖြစ်နေသည် ဟူသော ကိစ္စ။ ဖွံ့ဖြိုးပြီး နိုင်ငံ မဟုတ်သေးသော၊ ယခုမှ ဖွံ့ဖြိုး တိုးတက်ဆဲ နိုင်ငံဖြစ်သော သူရဿဝါတို့ နိုင်ငံသည် အဘယ်ကြောင့် ထိုစာရင်းတွင် ထိပ်နားသို့ ရောက်နေရ ပါသနည်း။ စဉ်းစား သော်လည်း အဖြေမထွက်။ ထို့ကြောင့် သူရဿဝါ ကိုယ်တိုင် အဘယ်ကြောင့် ဖြစ်နိုင်သည်ကို ထပ်မံ၍ လေ့လာ ကြည့်မိသည်။ နောက်ဆုံးတွင် ထိုသို့ လာရောက် လည်ပတ်ချင်ကြသည့် အကြောင်းအရာ သုံးခုကို စနစ်တကျ စုံစမ်းမှုဖြင့် သိလိုက်ရ လေသည်။ ဘာတွေပါလိမ့်။ ပြောပြပါမည်။

ပထမဆုံး တစ်ခုမှာ ရန်ကုန်မြို့တွင်း ပို့ဆောင်ပြေးဆွဲ နေသော ဟိုင်းလပ်၊ ဒိုင်နာ၊ ဘီအမ်၊ ချက်ပလက်၊ ရိုးရိုး၊ စပယ်ရှယ်၊ အထူး အစရှိသည့် လိုင်းကား များနှင့် သက်ဆိုင် နေသည်ကို တွေ့ရ၏။ ၄င်းတို့ကို နိုင်ငံခြားသား တိုးရစ်များ အထူးတလည် စိတ်ဝင်တစား ရှိကြ၏။ ယခင် လာရောက် လည်ပတ် ကြဖူးသော တိုးရစ်များ စမ်းသပ် စီးနင်းကြည့်ပြီး တဆင့် ပြန်လည် ဖောက်သည်ချမှု တို့ကြောင့် ၄င်းတို့မှာ နောက်ထပ် လာရောက် လည်ပတ်မည့် တိုးရစ်တို့၏ အထူး စိတ်ဝင်စား ခြင်းကို ခံရ၏။ သူတို့အပြောအရ ကျွန်တော်တို့ ဒိုင်နာဟု ခေါ်ကြသည့် ၄၉၊ ၁၀၅ အစရှိသည့် ကားများသည် သူတို့ နိုင်ငံများတွင် ကျင်းပသည့် ကားပြိုင်ပွဲမှ ပြိုင်ကားများထက် ဆယ်ဆမြန်အောင် မောင်းနိုင်သည် ဆို၏။ ဒိုင်နာများ၏ မြန်ဆန် ကြမ်းတမ်းသော အရသာကို ခံစားပြီး သည့်နောက် ဂျက်လေယာဉ် စီးရတာတောင် ပေါ့ရွှတ်ရွှတ် နိုင်သွားသည် ဆိုပဲ။ ဒိုင်နာ လိုင်းကား မောင်းသူတို့သည် ကားလမ်း ပေါ်မှာရော၊ လေထဲမှာပါ တလှည့်စီ မောင်းနိုင် ကြသည့် အစွမ်းရှိ သဖြင့် မတ်တပ်ရပ် စီးသူလည်း မသက်သာ၊ ထိုင်စီးသူလည်း မငြိမ့်ညောင်း။ ထိုကားများကို နိုင်ငံခြားသား တိုးရစ်များက မြန်မာသံ မပီတပီဖြင့် “ထိုင်နာ” ဟု ခေါ်ကြသည်။ ဒါလည်း မမှားပါ။ ထိုင်စီးလျှင်တောင် နာသည်ကိုး။ အဓိက စိတ်ဝင်စား ကြသည့် အချက်ကတော့ နိုင်ငံခြားမှာ ပြိုင်ကား ဟူသည့် အမျိုးအစားကို လူများများစားစား စီး၍ မရသော်လည်း ဒီမှာ ဒိုင်နာပြိုင်ကား များကို လူငါးဆယ်လောက် တပြိုင်တည်း စီးနိုင်အောင် လုပ်ထားသည့် နည်းစနစ် ဖြစ်လေသည်။

နောက်တစ်ခုက ထိုင်ခုံပြည့်သာ လူတင်သည် ဟူသော အထူး ဆိုသည့် လိုင်းကားများ။ စကားစပ်၍ တွေးမိ တာလေး တစ်ခု ပြောရဦးမည်။ သိတော်မူ ကြသည့်အတိုင်း ထိုကားများ ထိုင်ခုံပြည့်သာ လူတင်သည် စာကပ် သော်လည်း တကယ်တမ်း မတ်တပ်ရပ် စီးရသည့် ဦးရေက ပိုများသည်။ ဒီတော့ မတတ်သာ၍၊ ဝင်ငွေ အရနည်း၍ မတ်တပ် ခရီးသည် တင်လျှင်လည်း “ထိုင်ခုံပြည့်သာ လူတင်သည်” စာများကိုတော့ ဖြုတ်ထားဖို့ ကောင်းသည်။ မဟုတ်လျှင် ထိုင်ခုံမှာ ထိုင်ကြ သူများသာ လူဖြစ်ပြီး မတ်တပ်ရပ် နေရသည့် သူတွေကတော့ လူမဟုတ် သလိုလို။ ထားပါ … ဒီအထူးတွေကို တိုးရစ်များ စိတ်ဝင်စား ကြပုံကို ပြောပါမည်။ သူတို့ကတော့ မြန်မာလို မတတ်သဖြင့် ထိုင်ခုံပြည့် စာကပ်ပြီး မတ်တပ်တွေ တင်သည့် ကိစ္စကို သိလည်းမသိ၊ စိတ်လည်း မဝင်စား။ သူတို့ သဘောကျ တာက “စိတ်ဖိစီးမှု”။ သူတို့၏ အလုပ်ခွင်များမှ ကြီးကျယ် လှသည့် စိတ်ဖိစီးမှု များသည် ဒီကားပေါ်တွင် တစ်ယောက် လည်ဂုတ်ပေါ် တစ်ယောက် တက်ခွမတတ် စီးရသော ကျပ်တည်းမှုမှ ရရှိသည့် စိတ်ဖိစီးမှုလောက် မများပြား၊ မပြင်းထန်။ ဒီတော့ ဟိုပြန်ရောက်ရင် ခံနိုင်ရည် ရှိအောင် အထူးကား များပေါ်တွင် စိတ်ဖိစီးမှုကို အလေ့အကျင့် ရအောင် လာယူကြသည်။

နောက်တစ်ချက်က သူတို့နိုင်ငံများတွင် ဈေးကြီးပေး၍ သွားရသည့် ချွေးထုတ်ခန်း များကို ဒီဘတ်စ်ကားများ အပေါ်တွင် နှစ်ရာကျပ် ပေးရုံဖြင့် ချွေးထုတ်ခန်း အရသာ တင်မက ဘယ်နိုင်ငံ မှာမှ မရှိသည့် တမူထူးခြား ပူအိုက်သော အဲယားကွန်း ဆိုသည်များကို စိတ်ဝင်စား ကြခြင်းဖြစ်၏။ သို့သော် ပိုက်ဆံ တတ်နိုင်သော တိုးရစ်များ လောက်သာ အထူးကားတွင် ချွေးထုတ်၍ သိပ်မချမ်းသာသော တိုးရစ်များမှာ ရိုးရိုးလိုင်းကား များပေါ်တွင်သာ ချွေးထုတ် ကြလေသည်။ အဘယ်ကြောင့် ဆိုသော် ငါးဆယ်တန်လည်း ဒီခံစားမှု၊ နှစ်ရာတန်လည်း ဒီခံစားမှု .. အတူတူ ဖြစ်သော ကြောင့်ပင်။ နောက်တစ်ချက်က ကားစီးခ နှစ်ရာကို ငါးရာတန် ပေးလျှင် နှစ်ရာ ကျပ်တိတိသာ ပြန်အမ်းသည့် မြန်မာစပယ်ယာ များ၏ ထူးခြားသော Cash စနစ်ကို စိတ်ဝင်စားခြင်း ဖြစ်၏။ ခုနက ပြောသလို အထူးဖြစ်ဖြစ်၊ ရိုးရိုးဖြစ်ဖြစ်၊ ဒိုင်နာဖြစ်ဖြစ်၊ ဘီအမ်ဖြစ်ဖြစ် ဘယ်လို ကားမျိုးမှာမဆို သူတို့ စိတ်ဝင်စား လေ့လာချင်သည့် တူညီသော အချက် တစ်ချက် ရှိသည်။ ဘာလဲဆိုတော့ ခရီးသည်ကို ထမင်းရှင် ပီသစွာ ယဉ်ကျေးပျူငှာသမှုဖြင့် ဆက်ဆံကြသည့် စပယ်ယာများ၏ ကမ္ဘာ့ ဘယ်နေရာမှာမှ မရှိနိုင်သည့် Customer Service ပင် ဖြစ်လေ၏။

ခရီးသွား တိုးရစ်များ လေ့လာသင်ယူ ချင်ကြသော နောက်တစ်ချက်မှာ မိုဘိုင်းလ် ဖုန်းများ ဖြစ်၏။ မိုဘိုင်းလ် ဖုန်းများကို သူတို့က လေ့ကျင့်မှု တစ်ခုအတွက် စိတ်ဝင်စား ကြသည်။ Hip Hop အဆိုတော် ဒါမှမဟုတ် Heavy Rock အဆိုတော် ဖြစ်ချင်သည့် တိုးရစ်များ သူတို့နိုင်ငံတွင် အဆိုသင်တန်း ဈေးကြီး၍ ဒီမှာ မိုဘိုင်းလ် ဖုန်းဖြင့် လာရောက် လေ့ကျင့် ကြသည်။ ဖုန်းကို ကိုင်၍ “ဟယ်လို ကြားလား .. ဟယ်လို ကြားလား” လေ့ကျင့်၍ အော်ရင်း အော်ရင်း တဖြည်းဖြည်း အသံအောင်ကာ တကယ့် Heavy Rock အသံကို လေ့ကျင့် ကြသလို Service Area မိလား မမိလား လက်ကားယား ခြေကားယား စမ်းသပ်ရင်း လက်ဟန် ခြေဟန်ပါပါဖြင့် Hip Hop အဆိုတော် အမူအယာကို လေ့ကျင့် ကြသည်။ ယခု ဟိုမှာ နာမည်ကြီး နေကြသည့် Akon, 50 Cent, Michael Learns စသည့် အဆိုတော် များသည် ထိုနည်းများဖြင့် လာရောက် လေ့ကျင့်၍ ကမ္ဘာကျော် အဆိုတော် ဖြစ်ခဲ့ကြကြောင်း ထောက်ခံ လမ်းညွှန် ကြသည်တွင် ထိုအချက်ကို တိုးရစ်များ စိတ်ဝင်စား လာကြသည်ဟု အဆိုရှိ၏။ မယုံလျှင် ပုံပြင် မှတ်တော်မူ။

အဆိုပါ ခရီးသွား တိုးရစ်များ စိတ်ဝင်စား ကြသည့် နောက်ဆုံး အကြောင်းအရာ တစ်ခုမှာ မြန်မာ့ အင်တာနက် ဖြစ်လေ၏။ သူတို့ဆီတွင် ဖွင့်၍ မရသော Server not found, Connection time out အစရှိသည့် Web Page များကို ကျွန်တော်တို့ ထံတွင် အထူးအဆန်း သဘောထား၍ အံ့သြတကြီး လာရောက် ဖွင့်ကြည့် ကြရ၏။ တခါတလေ ကံဆိုးလျှင် သူတို့၏ ချစ်သူရည်းစား များနှင့် အဆင်မပြေ ဖြစ်ကြ၏။ ဟိုဖက်က ပြောတာ ဒီဖက်မရောက်၊ ဒီဖက်က ပြန်ပြောတာ ဟိုဖက်မသွားနှင့် အင်တာနက် ပေကပ်ကပ် နိုင်မှုကြောင့် နားလည်မှု လွဲကာ ရန်ပွဲတွေ ဖြစ်ကြ၏။ တခါတစ်လေ ဖြစ်ပါ၏။ သူတို့ စိတ်ဝင်စားသော လိုင်းကားများနှင့် အင်တာနက်ကို ပေါင်းစပ်၍ “စိတ်ရှည်သည်းခံ လမ်းကြောင်းမှန် သုံးရန် အင်တာနက်” ဟု ရွတ်ပြလျှင် သူတို့ အတော် သဘောကျ ကြ၏။ နားလည်လား မလည်လားတော့ မသိပါ။ အင်တာနက် အကြောင်းကို အလုံးစုံ လေ့လာပြီးလျှင် သူတို့ နှစ်သိမ့်တတ်သော စကားတစ်ခု ရှိ၏။ “ကော်နက်ရှင် မို့လို့ မသိမသာလေး .. လေးတာပါ၊ သံနက်ရှင်တို့ ပြဒါးနက်ရှင်တို့ နည်းစနစ်တွေ ပေါ်လာရင် အဆင်ပြေ သွားမှာပါ” တဲ့။ သူတို့ ပြောတာလည်း ကိုယ် နားမလည်ပါ။ ဘာပဲဖြစ်ဖြစ် သူတို့ကို ပြုံးပြလိုက်သည်။

သူတို့ ကျွန်တော်တို့ဆီ လာရောက် လည်ပတ်ချင်သည် ဆိုသော အဓိက အကြောင်းအရာ သုံးခုကို တွေးကြည့် သည့်အခါ Transportation, Communication နှင့် Media တည်းဟူသော လူတန်းစား အားလုံးအပေါ် အခြေခံကျကျ လွှမ်းမိုးထားသည့် ကိစ္စများ ဖြစ်နေသည်။ ဘာကြောင့်ပဲ ဖြစ်ဖြစ် စိတ်ဝင်စား ခံရပြီး လည်ချင် ပတ်ချင်စိတ် ရှိဖို့က အဓိက မဟုတ်လား။ နောင်လာမည့် ဘယ်အချိန်လောက်အထိ သူတို့၏ လေ့လာစူးစမ်း ချင်စိတ်သည် ဒီကိစ္စ သုံးခုအပေါ် ရှိနေ ဦးမည် ဆိုတာကို ဥာဏ်မမီဘဲ ကျွန်တော် စဉ်းစားနေဆဲ ဖြစ်ပါသည်။

“သူရဿဝါနှင့် မီဒီယာလှိုင်း”

“သူရဿဝါနှင့် မီဒီယာလှိုင်း”


သိကြသည့် အတိုင်းပဲ… အခုခေတ်က မီဒီယာများ ဘက်စုံ ဖွံ့ဖြိုး တိုးတက် လာသောခေတ်။ ရုပ်မြင်သံကြား၊ ရေဒီယို FM၊ ဂျာနယ် မဂ္ဂဇင်း၊ အင်တာနက် စသည်ဖြင့် ပေါ့လေ။ ကျွန်တော်တို့ လူသားများ နေ့စဉ်နှင့် အမျှ အဲဒီ မီဒီယာ လှိုင်းတွေ ကြားမှာ ယက်ကန် ယက်ကန် ကူးခပ် မျောပါ နေကြသည်။ ကမ္ဘာပေါ်ရှိ ဘယ်လိုလူ တစ်ဦး တစ်ယောက် မဆို မီဒီယာ လှိုင်း၏ ရိုက်ခတ်မှုနှင့် မလွတ်ကင်းနိုင်။ လူတိုင်း သတင်း၏ သားကောင် ဖြစ်နိုင်ကြသော ခေတ်ဖြစ်၏။ မီဒီယာများ တိုးတက် အားကောင်း လာသည်နှင့် အမျှ ကမ္ဘာက တစ်နေ့တခြား ကျဉ်း၍ ကျဉ်း၍ လာသည်ဟု ခံစားရသည်။ ကျွန်တော်တို့ ငယ်ငယ်တုန်း ကတော့ မီဒီယာ ဆိုလို့ ဘာသိမှာလဲ။ မသိဆို ဘာမှလည်း သိပ်မရှိ ဘူးလေ။ ကြည့်စရာ ရုပ်မြင်သံကြား ဆိုလို့ MRTV လောက်ရှိတာကိုး၊ နောက်မှ မြဝတီ တစ်လိုင်း ထပ်တိုးတာ။ စာပေ မီဒီယာ ကျတော့လည်း ကျွန်တော်တို့ ငယ်ငယ်က ဂျာနယ်တွေ သိပ်ခေတ်မစားသေး။ သတင်းစာနှင့် လစဉ်ထွက် မဂ္ဂဇင်းတွေ လောက်ပဲ ရှိတာ ဆိုတော့ သတင်းတွေက သိပ်ပြီး Fresh မဖြစ်။

ကျွန်တော် ခြောက်တန်း ခုနစ်တန်း အရွယ်မှာတော့ မီဒီယာလှိုင်းက အရင်ကထက် အနည်းငယ် ကြီးလာပြီ။ ဂျာနယ်များ နည်းနည်းပါးပါး ထွက်၍ ဖတ်ခွင့် ရလာပြီ။ အရင်ကထက် သတင်းက ပိုပြီး Update ဖြစ်လာ၏။ ရုပ်သံလည်း ဒီလိုပဲ မြန်မာ့အသံ အပြင် မြဝတီ တစ်လိုင်း ထပ်တိုး လာသည်။ နောက်ပြီး ဂြိုဟ်တု စလောင်းကနေ အားကစားတွေ၊ သတင်းတွေ ကြည့်၍ ရမှန်း သိလာပြီ။ ဒါပေမယ့် ပါပါရာဇီများကို ရှောင်ရင်း တိမ်းရင်း မတော်တဆ သေဆုံး သွားသည့် ဝေလမင်းသမီး ဒိုင်ယာနာ သတင်းကို ဖတ်ရတော့ စိတ်ထဲ စိုးရိမ်မိသည်။ တို့ဆီမှာများ အဲလိုတွေ ဖြစ်ရင် ဒုက္ခပဲ.. ဟူ၍။ ဒါတွေက မီဒီယာ၏ တိုးတက် လွန်မှုကြောင့် ဖြစ်တာကိုး။ ဒါပေမယ့်လည်း တစ်ဖက်က ကျတော့လည်း မီဒီယာကို ဒီထက် ပို၍ အားကောင်းလာ စေချင်သည်။ ဒါမှ နေ့စဉ်ဖြစ်ပျက် နေတာတွေကို အသေအချာ ချက်ချင်းလက်ငင်း သိခွင့် ရမှာလေ။

သိပ်မကြာလှသော အချိန်တွင် ကျွန်တော့် စိတ်ထဲ ဖြစ်စေချင်သော ဆန္ဒများ ပြည့်ရုံမက လျှံပါကျ သွားသည်။ ယခင်က တစ်ပတ်လျှင် လေး၊ ငါးစောင်သာ ထွက်ရှိသော သတင်းဂျာနယ်၊ အားကစား ဂျာနယ်များမှ သတင်းထူး သတင်းဦး များကို အလုအယက် ဖတ်ရှုကြရသည့် အခြေအနေမှ တစ်ရက်လျှင် အစောင်နှစ်ဆယ်မျှ ထွက်သော သတင်းဂျာနယ်၊ အားကစား ဂျာနယ်များမှ သတင်းများကို မနိုင်မနင်း ဖတ်ရှုခွင့် ရလာကြ၏။ မီဒီယာလှိုင်းက ပို၍ ပို၍ ထန်လာလေပြီ။ နောက်ပိုင်းတွင် အင်တာနက် Online Media ခေတ်စား လာတော့ မီဒီယာ တစ်တပ်တစ်အား တိုးလာသလို ကျွန်တော်တို့လည်း ပို၍ ခေါင်းအရှုပ်ခံ နေရာပေး ကြရပြီ။ ကျွန်တော်တို့နှင့် နီးနီးစပ်စပ် ထိတွေ့မှုရှိသော မီဒီယာများထဲတွင် အွန်လိုင်း မီဒီယာသည် ကျွန်တော်တို့ အတွက် အမြန်ဆန်ဆုံး သတင်း ပေးပို့မှု အပြင် မမှန်ကန်သော သတင်း ရာခိုင်နှုန်း အတော်များများ ကိုလည်း ပေးဝေနိုင်၏။ ကမ္ဘာ့ ဟိုဖက်ခြမ်းတွင် ဖြစ်ပျက်သည့် ကိစ္စတစ်ခုကို မိနစ်ပိုင်းအတွင်း အင်တာနက်မှ တဆင့် ကျွန်တော်တို့ မြင်ခွင့်ရနိုင်ပြီ။ ယခင်က ရုပ်မြင်သံကြား၊ ဂျာနယ် မဂ္ဂဇင်း စသည့် မီဒီယာများကို ကျွန်တော်တို့ ဖတ်ရှုသည့် လုပ်ငန်းစဉ်တွင် ၄င်းတို့က သတင်း ပေးပို့သူ ဖြစ်ပြီး ကျွန်တော်တို့က သတင်းကို လက်ခံရယူသူ သက်သက် ဖြစ်သော်လည်း Online Media တွင်မူ ကျွန်တော် တို့က တစ်ချိန်တည်းတွင် သတင်း ဖတ်ရှု လက်ခံသူ ဖြစ်နိုင်သလို သတင်း တင်ပြသူလည်း ဖြစ်နေနိုင်၏။ Facebook လို Social ဆိုက်များတွင် ဒါက ပိုသိသာသည်။

ကျွန်တော် ပြောခဲ့သလို မီဒီယာလှိုင်း၏ ကြီးမားသော ရိုက်ခတ်မှုနှင့် သတင်းပျံ့လွယ်မှုကို တစ်လောက မျက်ဝါး ထင်ထင် ကြုံလိုက်ရ၏။ ဘယ်ကနေ ဘယ်လို ထွက်လာသော သတင်းမှန်း မသိ။ ကျွန်တော် သတိထားမိချိန်တွင် လူ အတော်များများ လက်ထဲတွင် ရေသန့်ဘူး လေးတွေကို နေရောင်ထဲ ထောင်လျက်သား ဖြစ်နေကြပြီ။ ရေသန့်ဘူး၏ ဘေးဖက် မျက်နှာပြင်နှင့် နေရောင် ပေါင်းစပ်လျှင် ကမ္ဘာအေး မဟာပါသန လှိုဏ်ဂူထဲတွင် စံပယ်လျက် ရှိသော စွယ်တော်မြတ်က ထင်ထင်ရှားရှား ပေါ်လာပါသတဲ့။ ဘယ်က စဖြစ်သလဲ ဆိုတာ စုံစမ်းကြည့်တော့ ရွှေပြည်သာရှိ အိမ်တစ်အိမ်မှ ဘုရားစင်တွင် ကပ်ထားသော သောက်တော်ရေ ဖန်ခွက်ပေါ်တွင် စွယ်တော်က ထင်ထင်ရှားရှား ပေါ်နေသည် ဟူ၏။ လူအထောင် အသောင်းတွင် တစ်ယောက် ကုသိုလ်ထူး၊ တရားထူး ရှိ၍ ဒီလို တန်ခိုးတော် ပြခြင်းကို မြင်ရသည် ဆိုတာက ဖြစ်တန်ချေ ရှိသည်။ လက်ခံနိုင်၏။ ထိုသတင်း ပေါ်လာပြီး နောက်တစ်နေ့ နေရောင်ထဲတွင် ဘယ်သူက စပြီး ရေသန့်ဘူး ထောင်လိုက်သည် မသိ။ မကြာခင် Facebook ပေါ်တွင် ထိုသတင်းက အတော်ကို ပျံ့နှံ့၍ နေပြီ။ ရေသန့်ဘူးတွင် စွယ်တော် ပေါ်ခြင်းကို လူအတော်များများ မြင်ရသည် ဟုလည်း ဆို၏။ ဒီအတိုင်းဆို ဗုဒ္ဓ မြတ်စွယ်တော် စံနေပုံကို Sky Net ရုပ်သံလိုင်းမှ အပင်ပန်းခံ ရိုက်ကူး၍ ၂၄ နာရီ တိုက်ရိုက် ပြသနေသည့် Dhama Channel ကြီး အလကား ဖြစ်ပြီပေါ့။ တကူးတက တီဗီကြီး ဘယ်ဖွင့်ကြည့် နေတော့မလဲ။ သတိရတိုင်း ရေသန့်ဘူးလေး နေရောင်ထဲ ထောင်လိုက်၊ ထိုင်ကန်တော့လိုက် လုပ်လျှင် ပြီးနေသည့် ကိစ္စကြီးကို။ အဲဒီတော့.. လူတိုင်း ကိုင်သည့် ရေသန့်ဘူး တိုင်းတွင် စွယ်တော် တန်ခိုးပြသည် ဆိုတာတော့ မဖြစ်နိုင်ဟု ထင်သည်။

ဒီလိုမျိုး မြင်ရတယ် ဆိုတာ တော်တော်ကုသိုလ်ထူးမှ ဖြစ်နိုင်တာ ဆိုတော့ ကျွန်တော်လည်း အားကျမခံ နေရောင်ထဲ ရေသန့်ဘူးလေး ပြေးထောင်ကြည့်သည်။ ပလပ်စတစ် အကြည် အတွင်းထဲမှ အရေးအကြောင်း အချို့ကို နေရောင်ထိုး၍ အနည်းငယ် တလက်လက် ဖြစ်ခြင်းမှလွဲ၍ ဘာမှ ထူးထူးထွေထွေ မမြင်။ ဟိုက်… လူတိုင်းလိုလို မြင်နေတဲ့ ကိစ္စကို ငါမမြင်ဘူးဆိုတော့ အတော်ပဲ အကုသိုလ်များ၍ ဘုရားကွယ်ပြီလား။ လန့်သွားသည်။ ဒါနဲ့… အခြေအနေ ဆက်စောင့်ကြည့်တော့ ခဏနေ အွန်လိုင်းမှာ အုပ်စုနှစ်စု ကွဲသွားသည်။ အဲဒီလို မြင်ရတာက တကယ်ပဲ စွယ်တော် တန်ခိုးပြတာဟု ယုံကြည်သည့် အဖွဲ့နှင့် ဘယ်လိုမှ မဖြစ်နိုင်ဟု ငြင်းဆန်သည့် အဖွဲ့။ လက်မခံသည့် အုပ်စုမှ အချို့သူ များကလည်း သိပ္ပံနည်းကျ ရေသန့်ဘူးကို နေရောင်မှ အလင်းပြန်တာတွေ၊ အလင်းရိုက်တာတွေ စသည်ဖြင့် ချက်ကျ လက်ကျ ချေပကာ ပြောပြ၏။ မြင်ရသည် ဆိုသည့်သူ တွေကလည်း အို.. သိပ္ပံတွေ သံပိတ်တွေ လာမပြောနဲ့… တို့က တကယ်ကြီး မြင်ရတာ.. အဟုတ်.. ဘုရားစူး မိုးကြိုးပစ် မြွေကိုက် ကျားကိုက် စသည်ဖြင့် ကက်ကက်လန် ပြန်ပြော၏။ သူရဿဝါ ဘယ်အထဲ ဝင်ရ မည်နည်း။

သိပ္ပံ နည်းကျ အဖွဲ့၏ သဘောတရားများကို သဘောတူ လက်ခံ သော်လည်း အတင်းငြင်းဆန်လျှင် ကိုယ့် ဘာသာရေးကို အယုံအကြည် မရှိဘူးလား ဟူသော စွပ်စွဲချက်ဖြင့် မိစ္ဆာဒိဌိ နာမည် အတပ်ခံရမှာလည်း ကြောက်သည်။ ဒါနဲ့ နောက်တစ်နေ့ အိမ်ရှိ ဝရံတာတွင် ရေသန့်ဘူး ပြန်ထောင်၍ နေရောင် တည့်တည့်တွင် ပြန်စမ်းမိသည်။ ဟားဟား.. ဘယ်ရမလဲ၊ ပေါ်ပြီ။ ဘုရားမကွယ်တော့ဘူး… ငါက အကုသိုလ်ကောင် မဟုတ်ဘူး… တွေး၍ ဝမ်းသာသွားသည်။ အံမယ်… ပေါ်မယ့် ပေါ်တော့လည်း ဒီတိုင်းထားရင် စွယ်တော်.. နည်းနည်းလေး ဟိုဖက်လှည့်လျှင် ရွှေတိဂုံ စေတီတော် ပုံစံတူ၊ နည်းနည်း ထပ်လှည့်လျှင် ဆူးလေ စေတီတော်၊ အကုန်ပေါ်လေ၏။ လက်စသပ်တော့ ရေသန့်ဘူးတွင် ဘုရားပုံတော်များ ပေါ်ဖို့အတွက် FM ရေဒီယိုလိုင်း ဖမ်းသလို နည်းနည်းချင်းစီ စိတ်ရှည်ရှည် လှည့်ပေးရတာကိုး။ ဒီထက်သာ စိတ်ရှည်ရှည်ထားလျှင် ပဲခူးမှ ရွှေသာလျောင်းတောင် လှမ်းမြင်ရင် မြင်ရဖို့ ရှိသည်။ ဒီအတိုင်းဆို ဟန်ကျပြီ… အိုးမကွာ အိမ်မကွာ ဘုရားစုံ ဖူး၍ရပြီ။ အိမ်က ဘုရားစင်လေး နေရောင်ထဲ ရွှေ့၍ ရေသန့်ဘူးကို ဘုရားစင်ပေါ် တင်ထားလိုက်ရင် ကောင်းမလား။ တွေးရင်း ညနေစောင်းသွား၏။ သတိရ၍ ရေသန့်ဘူး လှမ်းကြည့်တော့ စွယ်တော်လည်း မပေါ်တော့၊ နေဝင်သွားပြီ… နေရောင်လည်း မရှိတော့။ သူရဿဝါလည်း ဒါက ဘယ်လို ဖြစ်တာလဲ။ သိပ္ပံနည်းကျလား၊ တကယ် ထူးထူးခြားခြား ဖြစ်တာလား.. မတွေးတတ်တော့။

သေချာတာ တစ်ခုကတော့ အခု ဤစာစုရေးနေချိန် အထိ အွန်လိုင်းပေါ်တွင် ဒီကိစ္စ အငြင်းအခုံများက မတိတ်သေး။ ယခုကိစ္စသည် တကယ့်ကို ထူးထူးခြားခြား စွယ်တော် ရေသန့်ဘူးပေါ် တန်ခိုးတော် ပြတာဖြစ်ဖြစ်၊ သိပ္ပံနည်းကျ အလင်းပြန် အရိပ်ထိုးတာ ဖြစ်ဖြစ် အွန်လိုင်း မီဒီယာ ပေါ်တွင်တော့ သတင်းတွေ ချက်ခြင်းတက်၊ ချက်ခြင်း လက်ခံ၊ ချက်ခြင်း ငြင်းဆန် စသည်ဖြင့် လှုပ်ရှားသွားတာ သေချာ၏။ နောက်နောင်လည်း ဘယ်လို ထူးခြားသော ကိစ္စမျိုးတွေ ပေါ်လာသည် ဖြစ်စေ.. ယခုလိုပင် ခေတ်မီ မီဒီယာများ၏ သတင်းပေးပို့မှု၊ ကျွန်တော်တို့၏ ဖြန့်ဝေမှု၊ ၄င်းကိစ္စ အပေါ်တွင် လက်ခံမှု၊ ငြင်းဆန်မှု စသည်ဖြင့် မီဒီယာလှိုင်းလုံးကြီးများကြား လူးလိမ့်ကူးခတ် နေကြရဦးမည် ဖြစ်လေသည်။

သူရဿဝါနှင့် ရှိုး

 

ခိုးကူးခွေ နှိပ်စက်မှုကြောင့် ဂီတ လောကသား အဆိုတော်များ ဒုက္ခ ရောက်ကြသော အခါ သမယ ဖြစ်သည့် အားလျော်စွာ ထုတ်ထားသော အခွေဖိုး အနည်းငယ်မျှ ကာမိရန် ရည်ရွယ်၍ သော်လည်းကောင်း၊ မိမိ၏ အနုပညာ အရည် အသွေးနှင့် နာမည် ကျော်ကြားမှုကို မြှင့်တင် လို၍ သော်လည်းကောင်း ဂီတ ဖျော်ဖြေပွဲ (ရပ်ကွက် အခေါ် ရှိုးပွဲ) များကို တွင်တွင် ကျယ်ကျယ် ပြုလုပ်၍ ဂီတချစ် ပရိသတ် များကလည်း ရှိုးပွဲသာ ဖြစ်ပါစေ၊ ဘယ်နေရာ ဖြစ်ဖြစ် လိုက်ကြည့်မည် ဟူသော ရဲရဲတောက် စိတ်ဓါတ်ကို ပိုင်ဆိုင် ထားကြသည် ဖြစ်သဖြင့် ရောင်းသူ ဝယ်သူ အသံတူ၍ ရှိုးပွဲများ ကဒီးကဒီး ပြုလုပ် ကြသော ရှိုးခေတ်ကြီး ဖြစ်သည့် အလျောက် မောင်သူရဿဝါ တစ်ယောက် သည်လည်း ဂလိုဘယ် ခေတ်ကြီးကို မမှီမကမ်း အမြီးတန်းလန်း ဆွဲ၍ ကျန်ခဲ့သူ မဖြစ်ရ လေအောင် ရှိုးပွဲ တစ်ပွဲလောက် ကြည့်ရှုရန် စိတ်အကြံ ဖြစ်မိလေသည်။

ရှိုးပွဲဟု ဆိုရာတွင် မြန်မာပြည်၌ (၁၂)လ ရာသီလုံး ပွဲတော်များ ရှိသည့် စံချိန်ကို ကျော်လွန်၍ ရှိုးပွဲများ သည်ကား အခါမရွေး၊ အကြောင်း ပြချက် မရွေး ရှိကြလေ၏။ အနောက်တိုင်း အင်္ဂလိပ် လူမျိုးတို့နှင့် သက်ဆိုင်သည့် ခရစ္စမတ် ပွဲတော် ရက်တွင်လည်း အထိမ်းအမှတ် ဟူ၍ ရှိုးကြ၏။ မြန်မာ့ ရိုးရာ သီတင်းကျွတ် မီးထွန်း ပွဲတော် ရက်တွင်လည်း ပျော်ပွဲရွှင်ပွဲ ဟူ၍ ရှိုးကြ၏။ ဒီဖက်နှစ်မှ ဟိုဖက်နှစ်သို့ ခုန်ကူးမည့် ညတွင်လည်း နှစ်သစ်ကူး အထူး ဟူ၍ ရှိုးကြ၏။ ဖေဖော်ဝါရီ (၁၄)ရက် ချစ်သူများနေ့ ဟူသော ရက်တွင်လည်း ချစ်သူများနေ့ အမှတ်တရ ဟူကာ ရှိုးပြန်၏။ တစ်ဦးနှင့် တစ်ဦး အပြိုင် အဆိုင် ဆန်းသစ် တီထွင် ကြသော ခေတ်ကြီး ဖြစ်သည့် အလျောက် နောက်ပိုင်းတွင် “တပို့တွဲလ အထိမ်းအမှတ် နာမည်ကျော် ဟစ်ဟော့ အဆိုတော် လေးများ ကိုယ်တိုင် ထမနဲထိုးရင်း သီချင်းဆိုမည့် ရောကာ မွှေကာ သမကာ ထမနဲ ရှိုးပွဲကြီး” တို့၊ “ပြာသိုလ အထိမ်းအမှတ် ကန်းထရီး အဆိုတော် ကြီးများက မြင်းစီးရင်း သီချင်းဆိုမည့် မြင်းခင်း အမှတ်တရ ရှိုးပွဲကြီး” တို့၊ “တော်သလင်းလ အထိမ်းအမှတ် ရော့ခ်ကာ ကြီးများ လှေလှော် သမ္ဗာန်ခပ်ရင်း သီချင်းဆိုမည့် တော်သလင်း လှေလှော်ရွက်တိုက် ရှိုးပွဲကြီး” တို့ မပေါ်လာ နိုင်ဘူးဟု ပြော၍မရ။

နောက်ပြီး ရှိုးပွဲ ဆိုသည်နှင့် နှစ်တန်း နှစ်စား ထပ်ခွဲ၍ ရသေးသည်။ ဖရီးရှိုးနှင့် လက်မှတ် ဝယ်၍ ကြည့်ရသော ရှိုးပွဲ ဟူ၍။ ဖရီးရှိုး ကတော့ အလကား ကြည့်ရသော ပွဲများ ဖြစ်သဖြင့် အကြွေးရလျှင် ဆင်တောင် သုံးကောင်လောက် ဝယ်ထားမည် ဟူသော သဘောနှင့် ကိုက်သဖြင့် အထွေအထူး ပြောစရာ မရှိပါ။ အဲ.. လက်မှတ် ဝယ်၍ ကြည့်ရသော ရှိုး။ သူရဿဝါတို့ လူပျိုပေါက် အရွယ်မှာ ရှိုးပွဲ လက်မှတ်ခ များက သုံးထောင်၊ လေးထောင်၊ ငါးထောင် အဲဒီ ပတ်ဝန်းကျင် ပေးရသည်။ ထိုတုန်းက ရှိုးပွဲ ဟူသည်မှာ ယခုလောက် သိပ်ပြီး ခေတ်မစားသေး။ နောက်ပိုင်း ရှိုးပွဲခေတ် ဖြစ်လာပြီး ရှိုးပွဲများ အပြိုင် အဆိုင် ဖြစ်လာသည်။ အရောင်း အဝယ် သဘောတရား အရ ကုန်ပစ္စည်း တစ်မျိုးတည်းကို ထုတ်လုပ်မှု များလာလျှင် ဝယ်လိုအား ရောင်းလိုအား ချိန်ဆ၍ ကုန်ပစ္စည်း ဈေးနှုန်းများ ကျဆင်းမှု ရှိသည်။ အဲဒါကို တွေး၍ ယခုနေ ငါးထောင် ပေး၍ ရှိုးပွဲ ကြည့်မည့် အစား ရှိုးပွဲများ များပြား လာ၍ ဈေးနှုန်းများ ကျလာပါမှ ခပ်များများ ကြည့်တော့မည် အားခဲ ထားတာ မှားပြီ။ ရှိုးပွဲများ များလာသလို လက်မှတ်ခ ဈေးနှုန်း များလည်း ပို၍ ပို၍ ပို၍ တက် တက် တက်လာသည်။

အဲဒီတော့ မထူးတော့ပြီ။ ရှိုးပွဲ တစ်ပွဲ လောက်တော့ ကြည့်ဖူးတယ် ရှိရအောင် ဈေးကြီးလည်း ကြည့်တော့မည်။ နာမည်ကျော် အဆိုတော်များ ပါဝင်သော ပွဲတစ်ပွဲ လက်မှတ် ဝယ်လိုက်၏။ ညနေ ခြောက်နာရီ စမည့်ပွဲ ဖြစ်သော်လည်း ငါးနာရီ မတိုင်ခင် ကတည်းက သူရဿဝါ ရောက်လေ၏။ အလို… သတင်းကြား ထားတာက အဆိုတော် ဆယ်ယောက် လောက်ပဲ ဆိုမှာ… အခု အဆိုတော်တွေ အယောက် ငါးဆယ်၊ တစ်ရာလောက် အသာလေး ရှိနေပါ ရောလား။ အသေ အချာ မျက်လုံး ပွတ်၍ ကြည့်မိမှ အဆိုတော်များ မဟုတ်၊ ရှိုးပွဲ လာအားပေး ကြသည့် ကိုကို မမ ပျိုပျို လှလှ ကလေးများ ဖြစ်ကြကုန်၏။ အော်… စင်ပေါ်တက် သီချင်း ဆိုမည့် အဆိုတော် များတောင် သူတို့လောက် ပြောင်ပြောင် ရောင်ရောင် ဝတ်လာဖို့ စိတ်ကူးရမည် မထင်။ ပြင်ဆင် ခြယ်သ ထားလိုက် ကြပုံများ အဆိုတော်ရှုံး၊ မင်းသမီးရှုံး။ ဘာကို သွားသတိရ သလဲ ဆိုတော့ ရွာမှာ တစ်နှစ်တစ်ခါ ကြုံတောင့် ကြုံခဲ အလှူပွဲ ရှိသဖြင့် “တစ်ရက်တည်းနဲ့ တစ်နှစ်စာ ဖုံ မှုန်နေအောင် ပြင်ပစ် လိုက်မဟဲ့” ဟူသော တောသူ ကလေးများ၏ စိတ်ပိုင်းဖြတ် ပုံမျိုး။

အချို့ ကောင်ကလေးများ ကျပြန်တော့ ရှိုးပွဲက မစသေး။ ခေါင်းပင် မထောင် နိုင်တော့။ သူရဿဝါ သနား သွားသည်။ “အော်… ဒီကောင်လေးနှယ် ကိုယ့်ဟာကိုယ် အိမ်မှာ ပုလင်းလေး ဝယ်သောက်ရင် အေးအေး ဆေးဆေး သောက်လို့ မှောက်လို့ ရရဲ့သားနဲ့ ကိုယ့်ဒုက္ခ ကိုယ်ရှာပြီး လူပေါင်း သောင်းခြောက်ထောင် ကြားထဲ မူးရရှာတယ်” ဟူ၍။ ဒါတွေက အသေးအဖွဲ။ တကယ့် ရှိုးပွဲ စတော့မှ သူရဿဝါ ဒုက္ခ ရောက်သည်။ နာမည်ကျော် အဆိုတော်က “မင်္ဂလာပါ” နှုတ်ဆက် စကားကို ဘတ်စ်ကား ပေါ်တွင် ခါးပိုက်နှိုက် ခံရ၍ ခြောက်ခြောက် ခြားခြား အော်သည့် အသံဖြင့် စတင် နှုတ်ဆက်သည်။ မှတ်သား ရပါပေ၏။ ဒီကြားထဲ စတိတ်စင် အနောက်တွင် ဘယ်သူတွေ ဆေးလိပ် ခိုးသောက်သည် မသိ။ စင်ပေါ်သို့ မီးခိုးလုံးများ ခဏခဏ တက်လာတာလည်း ကြုံရသည်။ အဆိုတော်က သီချင်း ဆိုပြန်တော့ သူ့သီချင်းသူ နှစ်ကြောင်း သုံးကြောင်း ပရိသတ်ဖက် မိုက်ထိုး ပေးကာ ဆက်ဆို ခိုင်းသည်။ အော်.. သီချင်း စာသား မေ့နေလို့ ဖြစ်မှာ ပါလေဟု ဖြေသိမ့် ရ၏။ တခါတလေ ကိုယ်က သူ့သီချင်း မရ၍ လိုက်မဆို လျှင်တောင် “ဟိုးအနောက်က ပရိသတ်တွေ လိုက်ဆိုလေ… လုပ်ပါ.. ကျယ်ကျယ်လေး” ဟူ၍ ဆိုချင်မှန်း မသိ၊ မဆိုချင်မှန်း မသိ အတင်းကာရော ဆိုခိုင်းတာလည်း ပါသေးသည်။ ကိစ္စမရှိ… ကာရာအိုကေ ဆိုင်မှာတောင် သွား သွား ဆိုနေသေးတာ။ တစ်ပုဒ် တစ်လေတော့ လိုက်ဆို ပစ်လိုက်မည်။

သူရဿဝါ အထင်နှင့် အမြင် တက်တက်စင် လွဲလေ၏။ နောက် အဆိုတော် တစ်ယောက် လာတော့လည်း ထိုနည်း လည်းကောင်း။ နှစ်ကြောင်း သုံးကြောင်း ဆိုပြီးလျှင် ပရိသတ်ကို ဆက်ဆို ခိုင်းပြန်၏။ ပရိသတ် ကလည်း အမှတ်မရှိ လိုက်ဆိုပြန်၏။ နောက်တစ်ယောက်.. နောက်တစ်ယောက် အကုန်လုံး ဒီအတိုင်း ဆက်ဖြစ်သည်။ သူရဿဝါ အူလည်လည် ဖြစ်လာ၏။ “နေပါဦး… စတိတ်ရှိုးနဲ့ ဆရာ ကန်တော့ပွဲများ ငါမှားပြီး ရောက်လာ သလား” တွေးမိသည်။ ဆရာ ကန်တော့ပွဲ များမှာလို ရှေ့ကနေ နည်းနည်း တိုင်ပေး တာကို နောက်လူများက ဆက်ဆိုရသည့် ပုံစံ ဖြစ်နေ၏။ ဒီလိုနှင့် အဆိုတော် ဆယ်ဦးလုံး သီဆိုမှုလည်း ပြီးရော.. သူရဿဝါ လည်ချောင်းများ နာ၍ ကျန်ခဲ့သည်။ နဝေတိမ်တောင် ဖြစ်၍ အိမ်ပြန် လာရင်း လမ်းမှာ မကျေမနပ် တွေးမိသည်။ “တောက်! ဒီလိုမှန်းသိ ကိုယ့်ဟာကိုယ် အိမ်မှာ ရေချိုးခန်းထဲ တစ်ယောက်တည်း အော်ဆို နေလိုက်ပါတယ်.. အခုတော့ လူတွေ ကြားထဲ သီချင်းတွေ လိုက်အော် ဆိုရတာ ရှက်လိုက်တာ” ဟူ၍။

အိမ်ပြန်ရောက်တော့ ချက်ချင်း မအိပ်နိုင်။ မှန်ချို ဆေးကလေး လျက်ရင်း ကောက်ချက် ချမိသည်။ အော်.. တကယ်တော့ ရှိုးပွဲ ဆိုတာ ကိုယ့်ပိုက်ဆံ ကိုယ်ပေးပြီး ကိုယ့်ဟာကိုယ် အဆိုတော်လို ပြင်ဆင် ဝတ်စားကာ ကိုယ့်ဟာကိုယ် မူးအောင် သောက်၍ ကိုယ့်ဟာကိုယ် သီချင်းများ ထည်လဲ အော်ဆိုကာ ကိုယ့်ဟာကိုယ် အိမ်ပြန်ရသော ကြုံတောင့် ကြုံခဲ ပွဲကြီး ဖြစ်ပေ တော့သကိုး။

 

သူရဿဝါနှင့် ခေတ်၏သမီးပျိုများ

ကျွန်တော်တို့ လက်ရှိ ကြုံတွေ့ နေရသော ခေတ်မှ စ၍ ကျွန်တော်တို့ မိဘ၊ ဘိုးဘွားများ ကြုံတွေ့ ခဲ့ရသော ခေတ်များ အထိ တစ်ခေတ်နှင့် တစ်ခေတ် ဖြည်းဖြည်းချင်း ပြောင်းလဲ လာပုံများ တွေ့ရသည်။ ခေတ်နှင့် ပတ်သက်၍ တခြား လူမှုရေး၊ စီးပွားရေး.. ဘာဆို ဘာမျှ မပြောချင်၊ သူရဿဝါက ခေတ်၏ ယောကျာ်းပျို ဆိုတော့ကာ ကိုယ် သန်ရာ သန်ရာ ဖြစ်သော ခေတ်၏ သမီးပျိုများ အကြောင်းပဲ ပြောချင်သည်။ ဝါသနာကို လွယ်လွယ် တားဖို့ ခက်သားကိုးနော့။ အမေတို့ ပြောဖူးတာ ကြားဖူးသည်။ သူတို့ နေထိုင်ရာ ခေတ်ထဲမှ ဝတ်စား ဆင်ယင်မှု များအလိုက် ခေတ်မီ ခေတ်ဆန်သည့် သမီးပျိုများ အကြောင်းကို ခွဲခြား ပြောကြသည်။ တစ်ချိန် အမျိုးသမီး လေးများ ထမီတိုတို ခြေသလုံးလောက် ဝတ်ထားတာ မြင်လျှင် ဒါခေတ်စား နေသည့် သမီးပျို များ၏ စတိုင်လ် ဖြစ်ပြီး ထိုမိန်းကလေးသည် ခေတ်ကို အမီလိုက် နေသော မိန်းမပျို ဖြစ်ကြောင်း အကဲဖြတ်၍ ရသည် ဆို၏။ အခြား စတိုင်လ်များလည်း ရှိဦးမည်။ ဒါကတော့ အမေတို့ ခေတ်ပေါ့။ ယခုခေတ်မှာ ကျတော့ ခေတ်၏ သမီးပျို ဖြစ်မဖြစ်ကို အဝတ်အစား စတိုင်လ် တစ်ခုတည်း ကြည့်ရုံနှင့် မရတော့။ ဒါဖြင့် ဘာတွေပါ ထည့်ကြည့်ရသလဲ။ ပြောပါမည်။

ပထမဆုံး အချက်… ယခုခေတ် မိန်းကလေးများ အဝတ်အစား ဝတ်ပုံက တစ်သမတ်တည်း မရှိတော့။ အမေတို့ ခေတ်ကလို ထမီတိုတို ဝတ်ထားတာ မြင်ရင် ခေတ်ကို အမီလိုက် နေသော မိန်းကလေးဟု ပြော၍ မရတော့။ အမျိုးမျိုး ကွဲပြား သွားကြပြီ။ သန်ရာ သန်ရာ ဝတ်ကျသည်။ သင်မြင်သော မိန်းကလေးသည် နိုင်ငံခြား လူစွမ်းကောင်း ဇာတ်ကား ထဲမှ စူပါမင်း ဝတ်လေ့ရှိသော အသားကပ် ဘောင်းဘီ အကျပ်ကို ဝတ်ချင်လည်း ဝတ်ထားမည်။ ဒါမှမဟုတ် ကျွန်တော်တို့ အိမ်တွင် ရေဝတ်ချိုးသော ဘောင်းဘီတို သာသာ ရှိသည့် “ပေါင်ရင်းနှင့်အထက်” ဘောင်းဘီတို၊ သို့မဟုတ် စကတ်ကို ဝတ်ချင်လည်း ဝတ်မည်။ ဒါမှမဟုတ် ဆင်းရဲသား ကျောမွဲများ ဖက်က ထောက်ခံ အားပေးသည့် သဘောနှင့် ရှေ့က စွပ်ကျယ်ကို နောက်ကျော အကျီ င်္သားများ ပြဲစုတ်၍ ပြောင်သလင်းခါ နေသည့် ရေထမ်းသမား ပုံစံမျိုး ဝတ်ချင်လည်း ဝတ်မည်။ ဆိုလိုတာက အဝတ်အစားကို ကြည့်၍ ဒီမိန်းကလေး ခေတ်မီသူလား၊ ခေတ်ဆန်သူလား၊ ခေတ်၏ သမီးပျိုလေး ဟုတ်သလား မဟုတ်သလား ခွဲခြား၍ မရတော့။ အဲ… ခေတ်၏ သမီးပျို ဟုတ် မဟုတ် သိချင်လျှင် ဆံပင်ကိုသာ ကြည့်။

သူတို့၏ ဆံမျှင် ကေသာ များသည် ဒီကနေ့ ကြည့်လျှင် စင်းလုံးချော ဖြောင့်နေ သော်လည်း နောက်တစ်နေ့ ရစရာ မရှိအောင် တွန့်လိမ် ကောက်ကွေး ဖြစ်ချင် ဖြစ်သွားမည်။ အနတ္တ အမြဲမရှိ၊ သင်္ခါရ သဘော ပြောမရ။ နောက်တစ်နေ့ သွားကြည့်… ထိုတွန့်လိမ် ကောက်ကွေးက အပေါ်ပိုင်း ပြန်ဖြောင့်နေ၍ အောက်ပိုင်း ပြန်ကောက်ချင် ကောက်နေမည်။ အားမရ သေးဘူးလား… နောက်တစ်နေ့ ထပ်သွားကြည့် တစ်ခေါင်းလုံး ကပ္ပလီများလို အကြေကောက် ဖြစ်ချင် ဖြစ်နေမည်။ တစ်ရက်လျှင် ဆံပင်ပုံစံ တစ်မျိုးနှုန်းပေါ့။ ဒါတောင် တစ်ပတ် ခုနစ်ရက်ပဲ ရှိပေလို့…. တစ်ပတ် ဆယ်ရက်လောက် ရှိလျှင်လည်း ဆံပင်ပုံစံ ဆယ်မျိုး ထားချင် ထားကြမည်။ ဆံပင်ပုံစံ အပြောင်းအလဲကို ကြည့်လျှင် ခေတ်၏ သမီးပျို ဖြစ်ကြောင်း သိနိုင်ပေ၏။ ဒါက အပြင်အဆင်ပိုင်း။

နောက်တစ်ချက် ဆိုရလျှင် ခေတ်၏ သမီးပျို အတော်များများ ယောကျာ်းလေး များနှင့် တကယ်ပင် ရင်ဘောင်တန်းကာ ယောကျာ်းတို့ လုပ်ကြသည့် အလုပ်များ ဖြစ်သော ဘီယာဆိုင် ထိုင်ခြင်း၊ ဘောလုံးပွဲ ကြည့်ခြင်း၊ ဘောလုံး ကန်ခြင်း စသည် တို့ကို လုပ်တတ် လာကြပြီ ဖြစ်ကာ နောင်ဆိုလျှင် ယောကျာ်းလေးများ ခါးတောင်းကျိုက်၍ ခြင်းလုံး ခတ်သလို သူတို့လည်း ဒီလို လုပ်မလာ ဘူးဟု မည်သူမှ ယတိပြတ် မငြင်းနိုင်။ ဒါတွေကို တတ်မြောက်သည့် မိန်းကလေး များအားလည်း ခေတ်မီ ခေတ်ဆန်သည့် ခေတ်သမီးပျိုများ စာရင်းတွင် ထည့်သွင်း ရပေမည်။ ဒါက အပြုအမူပိုင်း ဆိုရပေမပေါ့။ နောက်ပြီး အွန်လိုင်းမှ မိန်းမပျို လေးများကို ခေတ်၏ သမီးပျို ဟုတ် မဟုတ် သိချင်လျှင် လွယ်လွယ်လေး။ သိထားသင့်သည့် အချက်တစ်ချို့ကို သိလျှင် အသာအယာ ခွဲခြား၍ ရသည်။

ကမ္ဘာက ရွာကြီး ဖြစ်လာသော ယခုလို အချိန်တွင် မိန်းကလေး ပျိုအို မရွေး အင်တာနက် သုံးတတ်ကြသည် ဖြစ်သော်လည်း ခေတ်ကို အမီလိုက်သည့် ခေတ်၏ သမီးပျို များကို သာမာန် မိန်းကလေး များနှင့် ခွဲခြား၍ ရနိုင်သည်။ ခေတ်မီသော မိန်းကလေးတိုင်း လူကသာ တစ်ယောက်တည်း ဖြစ်သော်လည်း မေးလ်အကောင့် (သူတို့အခေါ် ချက်အကောင့်) လေး ငါး ဆယ်ခုတော့ အသာလေး ရှိကြသည်။ သူတို့၏ Gmai Username သို့မဟုတ် Facebook Username များကို ကြည့်ပါ။ နာမည်တွင် Pink တို့၊ Angel တို့၊ Cute တို့၊ Dream တို့ စသည့် စာလုံးများ ၄င်းတို့၏ Username တွင် ပါဝင်ပါက ဒါတွေသည် ခေတ်၏ သမီးပျိုများ ဖြစ်ကြသည်။ ဒါက နာမည်ပေးပုံ။

အဲ… စကားပြောပုံ ကျတော့ရော။ ခေတ်၏ သမီးပျို ကလေးများ စကားပြောပုံ သူများနှင့်မတူ၊ ထူးခြားသည်။ ကျွန်တော့်အား အွန်လိုင်းတွင် အတင်းကာရော သူ့ဦးလေး တော်ထားသည့် သမီးလေး တစ်ယောက် ပြောပုံကို ကြည့်ပါ။ “ဦးယေး… တမီး ဒီမနက် ဆေးကို လှုပ်ပီး မတောက်ဖစ်ဝူး ထင်တယ်ဂျ” တဲ့။ သူပြောချင်တာက “ဦးလေး… သမီး ဒီနေ့မနက် ဆေးကို သေချာလှုပ်ပြီး မသောက်ဖြစ်ခဲ့ဘူး” ဟု ပြောလိုရင်း ဖြစ်၏။ တခါတလေ သူပြောတာ ကျွန်တော်ပင် နားမလည်။ သေသေချာချာ ဘာသာပြန် ရသည်။ ခေတ်၏ သမီးပျို မှန်လျှင် စကားမပီကြ။ ဒါက နောက်တစ်ချက်။

အခုခေတ် သမီးပျိုများ ဓါတ်ပုံ ရိုက်ရတာ အလွန်ပင် ဝါသနာ ပါကြ၏။ အရင်ကလို ဖလင်နဲ့များ ဓါတ်ပုံ ရိုက်ရမည် ဆိုလျှင် အခုလောက်ရှိ အိမ်တိုင်ပါ ချွတ်ရလောက်သည် အထိ ဖြစ်လိမ့်မည်။ အခုတော့ ဒစ်ဂျစ်တယ် ကင်မရာ တွေနဲ့ ဆိုတော့ မထောင်းတာလှ။ ကင်မရာ နဲ့မှ မဟုတ်၊ လက်ကိုင်ဖုန်း နှင့်လည်း အလွယ်တကူ ရိုက်ကြသည်။ ဓါတ်ပုံ ရိုက်သည် ဆိုလို့ ရိုက်ပေးသည့် လူကို အချိန်ကုန် ခံ၍ မစောင့်။ ကိုယ့်ဟာကိုယ် ရိုက်၍ ရသည်။ ပထမဆုံး ညာဖက်လက် (သို့မဟုတ်) ဘယ်ဖက်လက်ဖြင့် လက်ကိုင်ဖုန်းကို မိမိ၏ ခေါင်းပေါ်သို့ မြှောက်၍ ကင်မရာကို ချိန်ထား၊ ပြီးလျှင် မျက်နှာကို အပေါ်မော့၍ ကင်မရာ ချိန်ထားသည့် လက်ကိုင်ဖုန်း ရှိရာသို့ ကြည့်၊ ပြီးလျှင် နှုတ်ခမ်းကို စူ၍ သော်လည်းကောင်း၊ ထော်၍ သော်လည်းကောင်း၊ မျက်လုံး ပြူး၍ သော်လည်းကောင်း၊ မျက်စောင်းခဲ၍ သော်လည်းကောင်း၊ လက်ကိုင်ဖုန်းနှင့် အမျိုးမျိုး အဖုံဖုံ ရန်ဖြစ်ပြီး သကာလ လက်ကိုင်ဖုန်းရှိ ခလုတ်ကို နှိပ်လိုက် သည်တွင် တစ်ကိုယ်တော် ဓါတ်ပုံ ရိုက်ခြင်း အမှု ပြီးလေ၏။ ထိုသို့ စိတ်အား လူအား ရှိသည်နှင့် ဓါတ်ပုံ အမျိုးမျိုး ရိုက်ကာ Facebook ပေါ်တွင် ခေါင်းမော့၍ အိုက်တင်ပေး ထားသော ဓါတ်ပုံများ တင်တတ်သည် ရှိသော်.. ထိုကလေးမသည် ခေတ်၏ သမီးပျို စစ်စစ်ဖြစ်ပေ၏။

ကျွန်တော် အထက်တွင် ပြောခဲ့သလို ယခုခေတ် မိန်းကလေး များသည် ဟိုးအရင် မိန်းကလေး များလို ဝတ်စား ဆင်ယင်ပုံ တစ်ခုတည်း ကြည့်ရုံနှင့် ခေတ်မီသည်၊ ခေတ်ဆန်သည်၊ ခေတ်၏ သမီးပျို ဖြစ်သည်ဟု ပြော၍ မရတော့။ ဘက်စုံ ထူးချွန်ရသည်။ ဆံပင် ပုံစံမျိုးစုံ၊ အဝတ်အစား ပုံစံမျိုးစုံ စသည့် ဝတ်စား ဆင်ယင်မှု အပိုင်း၊ ဘောလုံးပွဲ ဝါသနာပါ၊ ဘီယာသောက်၊ ဘောလုံးကန် စသည့် အပြုအမူပိုင်းနှင့် အင်တာနက်သုံး၊ အကောင့်တွေ အများကြီးထား၊ စကားမပီ၊ မျက်နှာမော့၍ ဓါတ်ပုံရိုက်၊ ရိုက်သမျှ Facebook တင် စသည့် Online Activity အပိုင်း သုံးပိုင်းထဲက တစ်ပိုင်းသော် လည်းကောင်း၊ နှစ်ပိုင်းသော် လည်းကောင်း၊ သုံးပိုင်း စလုံးကို သော်လည်းကောင်း ထူးထူးချွန်ချွန် တတ်မြောက် ပြုလုပ် နိုင်မှသာလျှင် တူတူတန်တန် ခေတ်၏ သမီးပျို ဖြစ်ရပေမည်ဟု ကျွန်တော် ကောက်ချက်ချ မိလေသည်။

ကွန်ပျူတာ keyboardတစ်ခုလုံးရဲ့အသုံးဝင်ပုံလေး

ဒီနေ့ကျနော်တို့ကွန်ပျူတာကိုအစဉ်မြဲသုံးနေကြတဲ့ရွှေညီအကိုအားလုံးကိုချစ်ခင်လေးစားစွာနဲ့
ကွန်ပျူတာ keyboardတစ်ခုလုံးရဲ့အသုံးဝင်ပုံလေးကိုအောက်မှာဖော်ပြပေးထားပါတယ်။
သိပြီးကြသူတွေလည်းများမယ်ထင်ပါတယ်၊မသိကြသေးတဲ့ချစ်မိတ်ဆွေအားလုံးအတွက်လိုအပ်တာ
လေးတွေရှိခဲ့ရင်အဆင်ပြေအောင်ပါ။ရေးမှားပြောမှားတာတွေရှိရင်လည်းခွင့်လွတ်နားလည်ပေး
လိမ့်မယ်လို့မျှော်လင့်ပါတယ်၊မြန်မာစာမရေးဖြစ်တာလည်းနှစ်ကတော်တော်ကြာသွားပါပြီ။
မြန်မာစာနဲ့တော့ဘာသာမပြန်တော့ပါဘူးစာလုံးတွေကရှင်းရှင်းလေးတွေဆိုတော့၊၊၊၊၊၊၊၊၊၊၊၊


အဆင့်၁။General keyboard shortcuts

Ctrl + A = Select all
Ctrl + C = Copy the highlighted content to clipboard
Ctrl + V = Paste the clipboard content
Ctrl + N = New (Create a new document, not in terminal)
Ctrl + O = Open a document
Ctrl + S = Save the current document
Ctrl + P = Print the current document
Ctrl + W = Close the close document
Ctrl + Q = Quit the current application


အဆင့်၂။Keyboard shortcuts for GNOME desktop

Ctrl + Alt + F1 = Switch to the first virtual terminal
Ctrl + Alt + F2(F3)(F4)(F5)(F6) = Select the different virtual terminals
Ctrl + Alt + F7 = Restore back to the current terminal session with X
Ctrl + Alt + Backspace = Restart GNOME
Alt + Tab = Switch between open programs
Ctrl + Alt + L = Lock the screen.
Alt + F1 = opens the Applications menu
Alt + F2 = opens the Run Application dialog box.
Alt + F3 = opens the Deskbar Applet
Alt + F4 = closes the current window.
Alt + F5 = unmaximizes the current window.
Alt + F7 = move the current window
Alt + F8 = resizes the current window.
Alt + F9 = minimizes the current window.
Alt + F10 = maximizes the current window.
Alt + Space = opens the window menu.
Ctrl + Alt + + = Switch to next X resolution
Ctrl + Alt + - = Switch to previous X resolution
Ctrl + Alt + Left/Right = move to the next/previous workspace


အဆင့်၃။Keyboard shortcuts for Terminal

Ctrl + A = Move cursor to beginning of line
Ctrl + E = Move cursor to end of line
Ctrl + C = kills the current process.
Ctrl + Z = sends the current process to the background.
Ctrl + D = logs you out.
Ctrl + R = finds the last command matching the entered letters. Enter a letter, followed by Tab + Tab = lists the available commands beginning with those letters.
Ctrl + U = deletes the current line.
Ctrl + K = deletes the command from the cursor right.
Ctrl + W = deletes the word before the cursor.
Ctrl + L = clears the terminal output
Shift + Ctrl + C = copy the highlighted command to the clipboard.
Shift + Ctrl + V (or Shift + Insert) = pastes the contents of the clipboard.
Alt + F = moves forward one word.
Alt + B = moves backward one word.
Arrow Up/Down = browse command history
Shift + PageUp / PageDown = Scroll terminal output


အဆင့်၎။Keyboard shortcuts for Compiz

Alt + Tab = switch between open windows
Win + Tab = switch between open windows with Shift Switcher or Ring Switcher effect
Win + E = Expo, show all workspace
Ctrl + Alt + Down = Film Effect
Ctrl + Alt + Left mouse button = Rotate Desktop Cube
Alt + Shift + Up = Scale Windows.
Ctrl + Alt + D = Show Desktop
Win + Left mouse button = take screenshot on selected area
Win + Mousewheel = Zoom In/Out
Alt + Mousewheel = Transparent Window
Alt + F8 = Resize Window
Alt + F7 = Move Window
Win + P = Add Helper
F9 = show widget layer
Shift + F9 = show water effects
Win + Shift + Left mouse button = Fire Effects
Win + Shift + C = Clear Fire Effects
Win + Left mouse button = Annotate: Draw
Win + 1 = Start annotation
Win + 3 = End annotation
Win + S = selects windows for grouping
Win + T = Group Windows together
Win + U = Ungroup Windows
Win + Left/Right = Flip Windows


အဆင့်၅။Keyboard shortcut for Nautilus

Shift + Ctrl + N = Create New Folder
Ctrl + T = Delete selected file(s) to trash
Alt + ENTER = Show File/Folder Properties
Ctrl + 1 = Toggle View As Icons
Ctrl + 2 = Toggle View As List
Shift + Right = Open Directory (Only in List View)
Shift + Left = Close Directory (Only in List View)
Ctrl + S = Select Pattern F2 = Rename File
Ctrl + A = Select all files and folders
Ctrl + W = Close Window
Ctrl + Shift + W = Close All Nautilus Windows
Ctrl + R = Reload Nautilus Window
Alt + Up = Open parent directory
Alt + Left = Back
Alt + Right = Forward.
Alt + Home = go to Home folder
Ctrl + L = go to location bar
F9 = Show sidepane
Ctrl + H = Show Hidden Files
Ctrl + + = Zoo
m In Ctrl + - = Zoom Out
Ctrl + 0 = Normal Size

ပုံလေးတွေအစမ်းတင်ကြည့်မယ်

Type your summary here Type rest of the post here